មន្ត្រីរដ្ឋាភិបាលបានថ្លែងថា មនុស្សរហូតដល់៣៤នាក់ ក្នុងនោះមានស្ត្រី និងកុមារត្រូវបានសម្លាប់នៅភាគខាងកើតសាធារណរដ្ឋប្រជាធិបតេយ្យកុងហ្គោកាលពីថ្ងៃសៅរ៍ ដែលការវាយប្រហារនេះ រដ្ឋាភិបាលបន្ទោសទៅលើក្រុមអ្នកចិញ្ចឹមសត្វ។ អ្នករាយការណ៍ព័ត៌មានកាសែតរ៉យទ័រអះអាងថា ជនរងគ្រោះរួមមានស្ត្រីមានផ្ទៃពោះ ត្រូវបានគេបាញ់ប្រហារ ចាក់សម្លាប់ និងដុតឲ្យឆេះនៅក្នុងផ្ទះ ស្ថិតនៅក្នុងភូមិ Mutarule ។
នៅក្នុងភូមិនេះ គេបានរាប់ឃើញសាកសព៣៧នាក់ ហើយក្នុងចំណោមពួកគេខ្លះត្រូវគេទុកចោលនៅក្នុងព្រះវិហារ។ អ្នកស្រុក និងមេដឹកនាំសាសនាបាននិយាយថា អ្នកជំងឺនៅក្នុងមន្ទីរពេទ្យក៏ទទួលរងការបាញ់ប្រហារផងដែរ ហើយក្រៅពីបាត់បង់ជីវិត នៅមានអ្នករងរបួស២០នាក់ ក្នុងចំណោមនោះ១០នាក់រងរបួសធ្ងន់។
អភិបាលក្រុង South Kivu លោក Marcellin Cishambo បានថ្លែងថា «វាជាទង្វើរបស់ក្រុម Congolese ដែលជាអ្នកវាយប្រហារខាងលើនេះ ដោយទំនាស់រឿងសត្វគោ»។ លោកបានបញ្ជាក់ថា មានអ្នកស្លាប់២៧នាក់។ អ្នកនាំពាក្យរដ្ឋាភិបាល លោក Laurent Mende បានថ្លែងថា វាជាការវាយប្រហារសងសឹកដែលធ្វើឡើងដោយសហគមន៍អ្នកចិញ្ចឹមសត្វ ។
ក្រុមរបស់សហគមន៍ចិញ្ចឹមសត្វបានព្យាយាមលួចសត្វគោរបស់កសិករ ហើយត្រូវកសិករសម្លាប់។ លោក Laurent Mende អះអាងថា អំពើហិង្សានេះបណ្តាលឲ្យមានអ្នកស្លាប់៣៤នាក់៕
