ខេត្តកំពត ៖ នៅវេលាម៉ោង៥ល្ងាច ថ្ងៃទី១៦ខែឧសភា២០១៧ ក្បួនសម្ដេចក្រុមព្រះនរោត្តម រណឫទ្ធិ ព្រះប្រធានឧត្តមក្រុមប្រឹក្សាផ្ទាល់ព្រះមហាក្សត្រ និងជាព្រះប្រធានគណបក្សរាជានិយម ហ្វ៊ុនស៊ិនប៉ិចបន្ទាប់ពីជួបសំណេះសំណាលជាមួយអ្នកគាំទ្ររបស់ខ្លួននៅខេត្តកំពតស្រាប់តែបានជួបឧប្បត្តិហេតុចរាចរណ៍តាមបណ្ដោយផ្លូវជាតិលេខ៣១ នៅភូមិព្រៃតាព្រឹក ឃុំស្ដេចគង់ខាងលិច ស្រុកបន្ទាយមាស ខេត្តកំពត ស្រាប់មានរថយន្តដឹកដីមួយគ្រឿងបើកបរដោយបុរសម្នាក់ឈ្មោះ ញឹម សូវិន អាយុ២៧ឆ្នាំបានបើកកាត់ពីមុខក្បួនតែម្ដង។
យោងតាមសាក្សីនៅកន្លែងកើតហេតុបានឲ្យដឹងថា គ្រោះថ្នាក់ចរាចរណ៍នេះបង្កឡើងដោយបុរសម្នាក់បើកឡានដឹកដីនេះ បើកកាត់មុខរថយន្តក្បួន ខណៈដែលក្បួនរថយន្តរបស់សម្ដេចក្រុមព្រះ នរោត្ដមរណឫទ្ធិ ព្រះប្រធានគណបក្សហ្វ៊ុន ស៊ិនប៉ិច បណ្ដាលឲ្យរថយន្តឡិចស៊ីស៤៧០ ពាក់ស្លាកលេខ ភ្នំពេញ 2J-9055 ជារថយន្តរបស់លោក ឆឹង ចំរើន ជាអនុប្រធានគណបក្សហ្វ៊ុន ស៊ិនប៉ិច បានធ្លាក់ចូលក្នុងស្រែបណ្ដាលឲ្យរថយន្តដាច់កង់ក្រោយ ប៉ុន្តែទោះបីយ៉ាងណាក៏ដោយពុំមានមនុស្សគ្រោះថ្នាក់ទេ ។
បន្ទាប់ពីគ្រោះថ្នាក់ចរាចរណ៍នេះរួចជនបង្កបានព្យាយាមបើករថយន្តគេចតែត្រូវក្បួនរថយន្តរួមដំណើរជាមួយគ្នាដេញឃាត់បានទាំងរថយន្ត និងជនបង្កជូនទៅសមត្ថកិច្ចដោះស្រាយតាមច្បាប់។
គួរបញ្ជាក់ថា កាលពីថ្ងៃទី២៥ ខែមេសា ឆ្នាំ២០១៥ កន្លងទៅសម្ដេចក្រុមព្រះធ្លាប់បានជួបគ្រោះថ្នាក់ចរាចរណ៍ម្ដងហើយដែលបង្កឡើងដោយរថយន្តដឹកដីដូចគ្នា នៅស្រុកព្រៃឈរ ខេត្តកំពង់ចាម គ្រានោះបណ្ដាលឲ្យអ្នកម្នាង អ៊ុក ផល្លា បានទទួលរងរបួសយ៉ាងដំណំរួមទាំងអង្គរក្ស៥នាក់ផងដែរ៕ដោយម៉ម ឡាយ
