កំពង់ចាម៖ ផ្លូវកៅស៊ូ១ខ្សែ ដែលមានប្រវែង២៥០០ម៉ែត្រ ទទឹង៦ម៉ែត្រ ស្ថិតនៅក្នុងភូមិឡឥដ្ឋ សង្កាត់បឹងកុក ក្រុងកំពង់ចាម ត្រូវបានបើកសម្ពោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី២៨ ខែឧសភា ឆ្នាំ២០១៧ ក្រោមអធិបតីភាពឯកឧត្ដម លន់ លឹមថៃ អភិបាលនៃគណៈ
អភិបាលខេត្តកំពង់ចាម មន្ត្រីពាក់ព័ន្ធជុំវិញខេត្ត និងប្រជាពលរដ្ឋជាច្រើននាក់ផងដែរ។
ជាកិច្ចចាប់ផ្ដើមលោក ចាន់ ផល្លី អភិបាលក្រុងកំពង់ចាម បានអានរបាយការណ៍ស្វាគមន៍ និងថ្លែងអំណរគុណអំពីស្នាដៃសំខាន់ៗ ដែលឯកឧត្តមគណៈអភិបាលខេត្ត បានដឹកនាំកសាងជូនប្រជាពលរដ្ឋ ក្រុងកំពង់ចាមនាពេលកន្លងមក ដែលជានិច្ចកាលឯកឧត្តមតែងតែយកចិត្តទុកដាក់លើការកសាងហេដ្ឋារចនាសម្ព័ន្ធ ផ្លូវ លូ លើកសោភ័ណភាពអនាម័យទីក្រុងស្អាត ប្រកបដោយភាពទាក់ទាញ ដើម្បីទាក់ទាញភ្ញៀវទេសចរណ៍ជាតិ និងអន្តរជាតិ ឲ្យមកទស្សនាក្រុងយើង ឲ្យបានច្រើនកុះករ ដោយឯកឧត្តមបានកសាងនូវសមិទ្ធផលសំខាន់ៗជាច្រើនទៀត។
នាឱកាសនោះដែរ ឯកឧត្ដម អភិបាលខេត្តបានលើកឡើងថា សមិទ្ធផលដែលប្រជាពលរដ្ឋទន្ទឹងរង់ចាំនេះ គឺជាសមិទ្ធផលដែលបានកើតឡើងពីសុខសន្តិភាព ក្រោមការខិតខំរបស់រាជរដ្ឋាភិបាលនាពេលកន្លងមក និងកំពុងបន្តទៅមុខទៀត ដូច្នេះយើងត្រូវចូលរួមថែរក្សាសុខសន្តិភាពនេះឲ្យបានគង់វង្សផងដែរ។
ឯកឧត្តម បានធ្វើការផ្តាំផ្ញើរសូមបងប្អូនសម្រេចចិត្តឲ្យបានច្បាស់លាស់ ព្រោះជិតដល់ពេលវេលាហើយ បងប្អូនដែលមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតឲ្យបានគ្រប់ៗគ្នាផងដែរ ៕
