កំពង់ចាម: ស្ត្រីម្នាក់និងកូនប្រុស អាយុ២ឆ្នាំ ត្រូវបានស្លាប់បាត់បង់ជីវិតយ៉ាងអាណោចអាធ័ម ខណៈដែល២នាក់ ម្តាយនិងកូន បានជិះម៉ូតូ១គ្រឿង បង្កគ្រោះថ្នាក់ចរាចរណ៍ ជាមួយ
រថយន្តរបស់ក្រសួងសុខាភិបាល កាលពីវេលាម៉ោង១១និង៣០នាទី ថ្ងៃទី៣០ ខែឧសភា ឆ្នាំ២០១៧ នៅចំណុចផ្លូវបំបែកជាបួន មុខមន្ទីរផែនការខេត្តកំពង់ចាម ស្ថិតក្នុងភូមិទី៧ សង្កាត់កំពង់ចាម ក្រុងកំពង់ចាម។
សមត្ថកិច្ចបានឲ្យដឹងថា នៅមុនពេលកើតហេតុ គេបានឃើញស្ត្រីម្នាក់ឈ្មោះកាន់ ស្រីហ៊ី អាយុ២១ឆ្នាំ ជិះម៉ូតូ១គ្រឿង ម៉ាកហុងដាឌ្រីម ពណ៌ខ្មៅ ពាក់ស្លាកលេខ កំពង់ចាម1M-2888 ឌុបកូនប្រុសម្នាក់ឈ្មោះឆេង ឆាវឆាវ អាយុ២ឆ្នាំ ក្នុងទិសដៅពីជើងទៅត្បូង លុះដល់ត្រង់ចំណុច ផ្លូវបំបែកជាបួន ក៏បានបុក ជាមួយ និងរថយន្ត ដឹកបរិក្ខាពេទ្យ១គ្រឿង ពាក់ស្លាកលេខ ( រដ្ឋ12.3.0020) របស់ ក្រសួងសុខាភិបាល ដែលបើកបរដោយបុរសម្នាក់ឈ្មោះឈុន លី ភេទប្រុស អាយុ៣៧ឆ្នាំ មានទីលំនៅភូមិសាមគ្គី៤ សង្កាត់ក្រសាំង ខណ្ឌពោធិសែនជ័យ រាជធានីភ្នំពេញ ក្នុងទិសដៅពីលិចទៅកើត បណ្តាលឲ្យក្មេងរងគ្រោះស្លាប់បាត់បង់ជីវិតភ្លាមៗនៅកន្លែងកើតហេតុ ចំណែកស្ត្រីជាម្តាយ ត្រូវរងរបួសយ៉ាងធ្ងន់ធ្ងរ ហើយត្រូវស្លាប់បាត់បង់ជីវិតនៅមន្ទីរពេទ្យពេទ្យ។
ក្រោយពីកើតហេតុ សមត្ថកិច្ចបានឃាត់រថយន្ត និងអ្នកបើកបរ បញ្ជូនទៅកាន់អធិការដ្ឋាននគរបាលក្រុងកំពង់ចាម ដើម្បីចាត់ការតាមនីតិវិធីច្បាប់៕
