កំពង់ចាម: ជម្លោះដោយពាក្យសម្ដី រហូតប្រែក្លាយទៅជាអំពើហិង្សា ដែលស្ត្រីម្នាក់ត្រូវគូរភាគីទំនាស់ ប្រើកាំបិតប៉័ងតោកាប់ប្រហារ បណ្តាលឲ្យរងរបួសយ៉ាងធ្ងន់ធ្ងរ ហើយជនបង្កបានរត់គេចខ្លួនបាត់។
ដោយទទួលការសង្គ្រោះពីសំណាក់ក្រុមគ្រូពេទ្យខេត្តកំពង់ចាម រហូតដល់ថ្ងៃទី១ ខែមិថុនានេះ ស្ត្រីរងគ្រោះបានធូរស្បើយបន្តិចហើយ តែជនដៃដល់មិនទាន់ត្រូវសមត្ថកិច្ចចាប់ខ្លួនបាននៅឡើយទេ ដូច្នេះស្ត្រីរងគ្រោះបានសូមឲ្យសមត្ថកិច្ចជួយរកយុត្តិធម៌ឲ្យគាត់ផង។
អធិការនគរបាលស្រុកចំការលើ លោកខេង ស្រេង បានប្រាប់តាមទូរសព្ទ កាលពីរសៀលថ្ងៃទី១ ខែមិថុនា នេះថា ករណីហឹង្សាដោយចេតនានេះ ថ្វីត្បិតតែពេលនេះ ជនដៃដល់បានរត់គេចខ្លួនក៏ពិតមែន តែមិនអាចរត់គេចពីសំណាញ់ច្បាប់បានរហូតនោះទេ ហើយទោះបីជាមានការសម្របសម្រួលរវាងភាគីទាំងសង្ខាងក៏ដោយ ក៏ជនបង្កមិនអាចរួចខ្លួនបានដែរ ព្រោះករណីកាប់ប្រហារលើជនរងគ្រោះនេះ វាមានភាពសាហាវព្រៃផ្សៃណាស់ ដូច្នេះកម្លាំងជំនាញបានកសាងសំណុំរឿង ដាក់ទៅតុលាការរួចរាល់អស់ហើយ និងកំពុងតាមស្វែងរកចាប់ខ្លួនជនដៃដល់ផងដែរ។
គួររំលឹកផងដែរថា កាលពីថ្ងៃទី៨ ខែឧសភា ឆ្នាំ២០១៧ វេលាម៉ោង៩និង២០នាទី នៅចំណុចខាងលិចផ្សារស្ពឺ ស្ថិតក្នុងភូមិស្ពឺកើត ឃំុស្ពឺ ស្រុកចំការលើ ខេត្តកំពង់ចាម មានករណីហឹង្សាដោយចេតនាមួយ ដែលប្រព្រឹត្តិដោយឈ្មោះឌុល សុវណ្ណរិទ្ធ ភេទប្រុស អាយុ២៧ឆ្នាំ ផាតិខ្មែរ នៅភូមិស្ពឺ(ក)ឃំុជយោ បានយកកាំបិតប៉័ងតោ កាប់ទៅលើឈ្មោះស៊ូ សុខឡាយ ភេទស្រី អាយុ៤៨ឆ្នាំ ជាតិខ្មែរ នៅភូមិក្បាលហុងចាស់ ឃំុល្វាលើ ស្រុកចំការលើ ត្រូវចំនួន០៣កន្លែង ១-ត្រូវក្បាលផ្នែកខាងឆ្វេង ២-ត្រូវកជើងខាងស្តាំ និង៣-ត្រូវក្បាលជង្គង់ឆេង។
ក្រោយពីធ្វើសកម្មភាពរួច ជនដៃដល់បានរត់គេចខ្លួនបាត់ ដោយឡែកជនរងគ្រោះត្រូវបានក្រុមគ្រួសារបញ្ជូនទៅសង្គ្រោះ នៅមន្ទីរពេទ្យខេត្តកំពង់ចាម ៕
