ដោយ៖ពលៈ
ខេត្តមណ្ឌលគិរី៖ លោក មើលសឿន អភិបាលស្រុកកោះញែក និងជាប្រធានគណៈបញ្ជាការឯកភាព ស្រុក ត្រូវបានប្រជាពលរដ្ឋរិះគន់ចំៗថា អសមត្ថភាពក្នុងការដឹកនាំកម្លាំងគណៈ
បញ្ជាការស្រុកកោះញែកចុះបង្រ្កាបបទល្មើសព្រៃឈើនៅក្នុងមូលដ្ឋានរបស់លោក ពីព្រោះរាល់ថ្ងៃនេះឈ្មួញបានធ្វើសកម្មភាពដឹកជញ្ជូនឈើនៅក្នុងស្រុកនេះយ៉ាងអនាធិតេយ្យយកទៅទម្លាក់នៅក្នុងទឹកដីខេត្តរតនៈគិរីជាប់នឹងព្រំប្រទល់ខេត្តមណ្ឌលគិរី រវាងស្រុកកោះញែក និងស្រុកលំផាត់ចំនុចកន្លែងវ៉ៃថ្មសម្រាប់ឱ្យឈ្មួញខេត្តរតនៈគិរីដឹកជញ្ជូនបន្តយកទៅលក់ឱ្យឈ្មួញយួនតាមច្រកអន្តរជាតិអូរយ៉ាដាវ។
បើតាមប្រភពព័ត៌មានច្បាស់ការបានឱ្យដឹងថាក្នុងមួយយប់ៗក្រុមឈ្នួញបានធ្វើការដឹកជញ្ជូនឈើខុសច្បាប់ មិនក្រោម៣០ទៅ៥០គ្រឿងនោះទេ តាមរយះរថយន្តកាមរីគូថស្វិត កាមរីគូថហើម កាមរីឆ្លាម កាមរីបាឡែន តូយូតា វីហ្គោ តូយូតា១បាំងកន្ល៖និងឡង់គ្រីស័រជាដើមសកម្មភាពដឹកជញ្ជូនឈើចេញពីស្រុកកោះញែក ក៏មានរថយន្តដឹកឈើរបស់សមត្ថកិច្ចមួយចំនួនផងដែរ ព្រមទាំងអ្នកកាសែតមួយក្តាប់តូច។
ក្រោយពីកម្លាំងប្រតិបត្តិសឹងរងមណ្ឌលគីរី ចុះបង្រ្កាបចាប់ពីថ្ងៃទី៦ខែមិថុនាឆ្នាំ២០១៧សកម្មភាពដឹកជញ្ជូនឈើនៅក្នុងស្រុកនេះពុំមានសកម្មភាពឡើយ តែក្រុមឈ្មួញបានផ្ទុកឈើប្រណិតនៅក្នុងរថយន្តហើយយកទៅលាក់ទុកចាំមានឱកាសបានធ្វើការដឹកជញ្ជូនឈើចេញទៅលាក់នៅផ្ទះមួយកន្លែង ចំនុចអូរវ៉ាក់ដែលចាប់ពីព្រឹករហូតមកដល់យប់ជារៀងរាល់ថ្ងៃ
ដោយសារក្រុមឈ្មួញទ្រាំមិនបាន បានធ្វើសកម្មភាពរហូតដល់មានករណីបាញ់បោះចំនួនបីគ្រាប់នៅមូលដ្ឋាលស្រុកកោះញែក វេលាម៉ោង១០យប់ នៅជិតព្រំប្រទល់ខេត្តរតនគិរី នឹងខេត្តមណ្ឌលគិរី ចំនុចអូររវ៉ាក់ ភូមិរវ៉ាក់ ឃុំរយ៉ផង។
សេចក្តីរាយការណ៏ពីស្រុកកោះញែកបានឲ្យដឹងថា នៅមុនពេលកើតហេតុគេបានឃើញមាន រថយន្តឡង់គ្រីស័រពីរគ្រឿងបានផ្ទុកឈើប្រណិតពេញៗ ដឹកចេញពីស្រុកកោះញែក ឆ្ពោះទៅស្រុកលំផាត់ ខេត្តរតនគិរី តាមបណ្តោយផ្លូវជាតិលេខ៧៦ នៅពេលរថយន្តដឹកឈើទាំងពីរគ្រឿងបានធ្វើដំណើរទៅដល់ ចំនុចជិតអូរវ៉ាក់ រថយន្តរបស់យោធាវរៈ១ ម៉ាកកាមរីឆ្លាម ដេញតាមពីក្រោយដើម្បីចាប់បង្ក្រាបរថយន្តដឹកឈើល្មើសច្បាប់ ភ្លាមៗនោះស្រាប់តែមានរថយន្តមួយគ្រឿងទៀតម៉ាក ម៉ុងតេរ៉ូ ដែលគេស្គាល់ថា ជាកម្មសិទ្ឋរបស់ឈ្មោះ ម៉ា ម៉េងធី មន្ត្រីយោធាទីចាត់ការព្រំដែន បានបើកទៅបិទពីមុខរបស់យោធាវរៈ១ នឹងគៀរថយន្តកាមរីឆ្លាមរបស់យោធារវៈធ្លាក់ផ្លូវខាងឆ្វេងដៃ បណ្តាលអោហខូចខាតអស់មួយផ្នែក តែមិនបណ្តាលឲ្យមានអ្នករងរបួសទេ។
លោកវរៈសេនីយ៏ទោ ឃិន បញ្ញា មេបញ្ជាការវរៈសេនាតូចអន្តរាគមន៏លេខ១ បានឲ្យដឹងថា ពិតជាមានករណីបាញ់ដូចសេចក្តីរាយការណ៏ខាងលើនោះមែន ហើយអ្នកបាញ់គឺជា មន្ត្រីរបស់លោកដែលបានចាត់ទៅដើម្បី ទប់ស្កាត់នឹងបង្ក្រាបការជួញដូរឈើខុសច្បាប់ ប៉ុន្តែនៅពេលមន្ត្រីរបស់លោកកំពុងអនុវត្តន៏ការងារ ស្រាប់តែមានជនម្នាក់ដែលគេស្គាល់ថា ធ្លាប់ធ្វើការនៅតំបន់ប្រតិបត្តិការសឹករងខេត្ត ឥឡូវឮថា ធ្វើនៅទីចាត់ការព្រំដែន បានចេញរថយន្តបាំងពីមុខរថយន្តសមត្ថកិច្ចដែលកំពុងប្រតិបត្តិការការងារ។
លោកមេបញ្ជាការបានបន្តថា ចំពោះករណីនេះលោកកំពុងស្រាវជ្រាវ លំអិតថា តើបុគ្គលឈ្មោះ ម៉ា ម៉េងធី ពិតជាកាងបទល្មើសព្រៃឈើឬយ៉ាងណា ចំណែកករណីបាញ់ចំនួនបីគ្រាប់នោះ ក៏ដោយសារតែមន្ត្រីរបស់លោក បាញ់បង្អើលរថយន្តដែលបានធ្វើសកម្មភាព
គៀបរថយន្តសមត្ថកិច្ច។
មន្ត្រីយោធាឈ្មោះ ណាត បម្រើការងារនៅវរៈ១បានទទួលស្គាល់ថា ពិតជាបានបាញ់មែន ដើម្បីការពារខ្លួនពីក្រុមឈ្មួញរកស៊ីឈើខុសច្បាប់។
ចំណែកឈ្មោះ ម៉ា ម៉េងធី បានប្រាប់អ្នកកាសែតថា ខ្លួនមិនបានកាងបទល្មើសនោះទេ ខណៈពេលកើតហេតុខ្លួនក៏ធ្វើសកម្មភាពដេញ ប្រម៉ាញ់រថយន្តដឹកឈើដែរ មិនមានចេតនារារាំងរថយន្តយោធាវរៈ១ឡើយ។
ទោះយ៉ាងណាក៏ដោយករណីខាងលើនេះគេនៅមិនទាន់ដឹងថា អាជ្ញាធរមូលដ្ឋាននឹងមានវិធានការបែបណានោះទេ ចំពោះការបង្ក្រាបបទល្មើសព្រៃឈើខុសច្បាប់រហូតដល់មានការផ្ទុះអាវុធនេះ៕
