ការ៉ាជី៖ ក្រោយពីមានការប្រយុទ្ធគ្នាពីរាត្រីដល់ភ្លឺ និងការប្រកាសបើកឲ្យដំណើរការឡើងវិញ ក្រុមខ្មាន់កាំភ្លើងដែលគាំទ្រដោយពួកតាលីបង់ បានបើកការបាញ់ ប្រហារជាថ្មីម្ដងទៀត ទៅលើអាកាសយានដ្ឋានអន្តរជាតិការ៉ាជី បន្ទាប់ពីក្រុមកម្លាំង រដ្ឋាភិបាលប៉ាគីស្ថាន បានសម្លាប់ក្រុមតាលីបង់ ១៥នាក់ នៅភាគខាងជើងនៃប្រទេស កាលពីព្រឹកថ្ងៃអង្គារនេះ នេះបើយោងតាមព័ត៌មានបរទេសនានា ចេញផ្សាយនៅរសៀលថ្ងៃទី១០ ខែមិថុនា ឆ្នាំ២០១៤។
ដោយឡែក មន្ត្រីប៉ាគីស្ថាន បាននិយាយថា សាកសពចំនួន ០៧នាក់ទៀត ត្រូវបានគេរកឃើញ ក្រោយ ការវាយប្រហារនៅព្រលាន យន្តហោះអន្តរជាតិ ជីនណា ស្ថិតនៅភាគខាងត្បូងទីក្រុង ការ៉ាជី ប្រទេស ប៉ាគីស្ថាន នៅព្រឹកថ្ងៃអង្គារនេះ ដែលនាំឲ្យតួលេខអ្នកស្លាប់កើនឡើងដល់ ៣៨នាក់។
ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃអង្គារ ទី១០ ខែមិថុនា ឆ្នាំ២០១៤ ដោយផ្អែក តាមការ លើកឡើងរបស់លោក Sagheer Ahmed រដ្ឋមន្ត្រីសុខាភិបាលរបស់ខេត្ត ស៊ីន របស់ប៉ាគីស្ថានថា សាកសពចំនួន ០៧នាក់ទៀត ត្រូវបានគេរកឃើញ នៅកន្លែងត្រជាក់ នៃអាកាសយានដ្ឋាននោះ។
អ្នកដែលស្លាប់ទាំង ០៧នាក់នោះ ជាបុគ្គលិករបស់ក្រុមហ៊ុនដឹកជញ្ជូនឯកជន ដែលបានគេច ខ្លួនចូល ទៅកាន់កន្លែងត្រជាក់នោះ អំឡុងពេល វាយប្រហារ។ ក្រោយមកកន្លែងដែលពួកគេលាក់ខ្លួននោះ ត្រូវបានអគ្គីភ័យឆាបឆេះ ដោយអ្នកទាំង ០៧នាក់នោះ ជាប់នៅខាងក្នុងទាំងអស់។ មិនទាន់មានព័ត៌មានលម្អិតនៅឡើយទេមកដល់ព្រលប់ថ្ងៃអង្គារ ទី១០ ខែមិថុនា ឆ្នាំ២០១៤៕ 
