កំពង់ចាម: ឧបករណ៍បទល្មើសនេសាទ សាច់មងក្រឡាញឹកជាច្រើនម៉ែត្រ ដែលបានបំផ្លិចបំផ្លាញកូនត្រីចម្រុះគ្រប់ប្រភេទ ត្រូវបានកម្លាំងប៉ុស្តិ៍នគរបាលរដ្ឋបាលបារាយណ៍ អាជ្ញាធរមូលដ្ឋាន និងប្រជាពលរដ្ឋធ្វើការដុតបំផ្លាញចោល កាលពីព្រឹកថ្ងៃទី២០ ខែមិថុនា ឆ្នាំ២០១៧។
សមត្ថកិច្ចបានឲ្យដឹងថា ដោយអនុវត្តតាមបទបញ្ជារបស់លោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម កម្លាំងគណៈកម្មការចម្រុះ ដែលមានសភាព ដឹកនាំដោយលោកអនុសេនីយ៍ឯក នឹម ឆន នាយប៉ុស្តិ៍នគរបាលរដ្ឋបាលបារាយណ៍ បានដុតបំផ្លាញចោល នូវឧបករណ៍បទល្មើសនេសាទ សាច់មងក្រឡាញឹកចំនួន១២មាត់លូ ដែលកម្លាំងប៉ុស្តិ៍នគរបាលរដ្ឋបាលបារាយណ៍ សហការណ៍ជាមួយ សមាជិកក្រុមប្រឹក្សាឃុំ បារាយណ៍ និងប្រធានសហគមន៍នេសាទ៧មករា ចុះទៅបង្ក្រាប នៅចំណុចបឹងផ្ទោល ស្ថិតក្នុងទឹកដីភូមិសាស្ត្រភូមិបន្ទាយ ឃុំបារាយណ៍ ស្រុកស្រីសន្ធរ ខេត្តកំពង់ចាម កាលពីថ្ងៃទី១៨ ខែមករា ឆ្នាំ២០១៧ នាពេលកន្លងទៅ។
ក្រោយពីទទួលបទបញ្ជាពីលោកព្រះរាជអាជ្ញា កម្លាំងប៉ុស្តិ៍បានបង្កេីតគណៈកម្មការបានប្រមូលវត្ថុតាងដែលបានដកហូតមករក្សាទុក នៅប៉ុស្តិ៍នគរបាលរដ្ឋបាលបារាយណ៍ ទាំងអស់ហើយបានធ្វើការដុតបំផ្លាញចោលតែម្តង ៕
