កំពង់ចាមៈ សង្វៀនបញ្ជល់មាន់មួយកន្លែង ដែលលួចបើកលេងយ៉ាងអនាធិបតេយ្យ ដោយភ្នាល់ចាក់លុយរាប់លានរៀល ត្រូវបានកម្លាំងនគរបាលស្រុកកងមាសចុះបង្ក្រាប កាលពីវេលាម៉ោង២និង៣០នាទី រសៀលថ្ងៃទី២១ ខែមិថុនា ឆ្នាំ២០១៧ ស្ថិតនៅក្នុងភូមិកោះតូច ឃុំពាមជីកង ស្រុកកងមាស ខេត្តកំពង់ចាម។
សមត្ថកិច្ចបានឲ្យដឹងថា ក្រោយពីទទួលបានបទបញ្ជាពីលោកឧត្តមសេនីយ៍ ឯម កុសល ស្នងការនគរបាលខេត្តកំពង់ចាម កម្លាំងជំនាញព្រហ្មទណ្ឌនៃអធិការដ្ឋាននគរបាលស្រុកកងមាស សហការណ៍ជាមួយកម្លាំង ប៉ុស្តិ៍នគរបាលរដ្ឋបាលពាមជីកង បានធ្វើការចុះបង្ក្រាបសង្វៀនបញ្ជល់មាន់ខាងលើ ដោយសមត្ថកិច្ចដកហូតបាននូវវត្ថតាងរួមមាន ម៉ូតូចំនួន២០គ្រឿង ជញ្ជីងថ្លឹងមាន់ចំនួន១គ្រឿង ស៊ុំក្រុងមាន់ចំនួន៣ កៅអីជ័រតូចៗចំនួន១០ ចំណែកក្រុមអ្នកញៀនល្បែងទាំងនោះ បានដឹងខ្លួនមុន ហើយនាំគ្នារត់គេចខ្លួនបាតជើងសព្រាតតែម្តង។
បច្ចុប្បន្ន វត្ថុតាងទាំងអស់ ត្រូវបានយកទៅរក្សាទុកនៅអធិការដ្ឋាននគរបាលស្រុកកងមាស ដើម្បីចាត់ការតាមនីតិវិធីច្បាប់៕
