ត្បូងឃ្មុំ: ពិធីប្រកាសចូលកាន់មុខតំណែងអភិបាល នៃគណៈអភិបាលខេត្តត្បូងឃ្មុំ ដោយឯកឧត្តម លី ឡេង ឋានន្តរសក្ដិឧត្ដមមន្ត្រី ថ្នាក់លេខ៦ ជាអភិបាល នៃគណៈអភិបាលខេត្តត្បូងឃ្មុំ រីឯឯកឧត្តម ប្រាជ្ញ ចន្ទ ត្រូវបានព្រះមហាក្សត្រ ត្រាស់បង្គាប់ តែងតាំង និងផ្ដល់ឋានៈ ជាទីប្រឹក្សារាជរដ្ឋាភិបាល មានឋានៈស្មើរដ្ឋមន្ត្រី។
ពិធីនេះត្រូវបានប្រារព្ធធ្វើឡើង នៅសាលប្រជុំសាលាខេត្តត្បូងឃ្មុំ នាល្ងាចថ្ងៃទី២៧ ខែមិថុនា ឆ្នាំ២០១៧ ក្រោមអធិបតីភាព សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម លោកជំទាវ លោក លោស្រី ប្រធានមន្ទីរពាក់ព័ន្ធជុំវិញខេត្ត និងមន្ត្រីកងកម្លាំងប្រដាប់អាវុធជាច្រើនរូបទៀត។
ជាកិច្ចចាប់ផ្ដើម ឯកឧត្តម ប្រាជ្ញ ចន្ទ អភិបាលខេត្តត្បូងឃ្មុំ ដែលត្រូវផ្លាស់ប្ដូរទៅកាន់មុខតំណែងថ្មី បានឡើងមានមតិស្វាគមន៍ និងអានរបាយការណ៍ អំពីកិច្ចការដឹកនាំ របស់ឯកឧត្តម នាពេលកន្លងមក។
បន្ទាប់ពីការអានព្រះរាជក្រឹត្យ អនុក្រិត្យ ស្តីពីការផ្ទេរភារកិច្ច និងតែងតាំងមុខតំណែងមន្ត្រីរាជការ ដោយលោកអ៊ួង ចាន្ធី ប្រធាននាយកដ្ឋានបុគ្គល នៃអគ្គនាយកដ្ឋានរដ្ឋបាល ក្រសួងមហាផ្ទៃ។
បន្ទាប់មក ឯកឧត្តម លី ឡេង អភិបាលខេត្តត្បូងឃ្មុំ ដែលទើបតែទទួលការតែងតាំងមុខតំណែងថ្មី បានឡើងធ្វើការប្តេជ្ញាចិត្ត ហើយក៏បានទទួលព្រះរាជក្រឹត្យ អនុក្រិត្យ និងទទួលត្រារដ្ឋបាលខេត្ត ដែលប្រគល់ជូនដោយ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ជាកិច្ចបញ្ចប់ សម្តេចក្រឡាហោម បានឡើងមានមតិសំណេះសំណាល និងធ្វើការផ្តាំផ្ញើរដល់គណៈបញ្ជាការឯកភាពខេត្ត ត្រូវបង្កការយកចិត្តទុកដាក់ លើការគ្រប់គ្រងក្រុមប្រឹក្សាឃុំ សង្កាត់ ក្រោយពីមានការបោះឆ្នោតជ្រើសរើសក្រុមប្រឹក្សាឃុំ សង្កាត់រួចមក ជាពិសេសនោះគឺ ការបើកយុទ្ធនាការប្រឆាំងគ្រឿងញៀន និងការទប់ស្កាត់បទល្មើសនានា ដូចជាការពង្រឹងគ្រប់គ្រងអាវុធជាតិផ្ទុះ ទប់ស្កាត់ការរត់ពន្ធអាវុធ នាំចេញទៅក្រៅប្រទេស ដូចជាប្រទេសភូមាជាដើម និងការទប់ស្កាត់រាល់ការចរាចរដឹកជញ្ជូនឈើខុសច្បាប់ ដែលទឹកដីខេត្តត្បូងឃ្មុំ ជាអំណោយផល សម្រាប់ការឆ្លងកាត់ឈើប្រណិត ចូលទៅប្រទេសវៀតណាមផងដែរ ៕
