ប្រធានាធិបតីកូរ៉េខាងត្បូង លោកស្រី ផាក គុនហេ នៅថ្ងៃអង្គារ បានជំរុញឲ្យប៉ូលីស និងព្រះរាជអាជ្ញា ត្រូវស្វែងរកគ្រប់វិធីដែលឈានទៅរក ការចាប់ខ្លួនម្ចាស់សាឡង់ ដឹកអ្នកដំណើរ សេវ៉ុល ដែលកំពុងរត់គេចខ្លួន ដើម្បីធ្វើឲ្យប្រាកដក្នុងការ នាំមកនូវយុត្តិធម៌ ដែលជាការទទួលខុសត្រូវ ចំពោះមហន្តរាយបណ្តាលឲ្យ មនុស្សច្រើនជាង ៣០០ស្លាប់ និងកំពុងបាត់ខ្លួន។
យោងតាមទីភ្នាក់ងារ ព័ត៌មានកូរ៉េខាងត្បូង យ៉ុនហាប់ ចេញផ្សាយនៅថ្ងៃអង្គារ ទី១០ ខែមិថុនា ឆ្នាំ២០១៤ ដោយផ្អែកតាមការលើកឡើង របស់លោកស្រី ផាក ថា វាមិនមែនជាការវិនិច្ឆ័យ ណាមួយនោះទេ ដែលប៉ូលីស និងព្រះរាជអាជ្ញា បរាជ័យក្នុងការចាប់ខ្លួនលោក យូ ប្យ៉ុងអឿន ដែលជាម្ចាស់នៃក្រុមហ៊ុន ចុងហ្គែយីន ម៉ារីន ដែលជាប្រតិបត្តិករសាឡង់។
លោកស្រី ផាក បាននិយាយនៅក្នុង កិច្ចប្រជុំគណៈរដ្ឋមន្ត្រី ដោយផ្អែកទៅតាមរបាយការណ៍ រួមបញ្ចូលគ្នាថា លោក យូ ត្រូវតែនាំមកនូវយុត្តិធម៌។ ពាក់ព័ន្ធនឹងដំណឹងនៃការ តាមចាប់ខ្លួនម្ចាស់សាឡង់ ដែលនាំមកនូវគ្រោះមហន្តរាយនេះ ព្រះរាជអាជ្ញា បានលើកឡើងនូវចំនួនទឹកប្រាក់សម្រាប់ជារង្វាន់ ចំពោះព័ត៌មានមួយណា ដែលឈានទៅដល់ការចាប់ខ្លួន លោក យូ និងកូនប្រុសច្បង របស់លោកឈ្មោះ ដេក្យុន នូវទឹកប្រាក់ចំនួន ៥០០លានវ៉ុន ស្មើនឹង ៤៩២.០០០ដុល្លារ និង១០០លានវ៉ុនទៀត ជាការលើកទឹកចិត្ត៕
