កំពង់ចាម៖ នៅព្រឹកថ្ងៃទី១១ ខែមិថុនា ឆ្នាំ២០១៤នេះ មានសិស្សស្រី ចំនួន២៣ នាក់ បានដួលសន្លប់ ជាបន្តបន្ទាប់ ហើយត្រូវបានគេដឹកយកទៅសង្គ្រោះ នៅមន្ទីរបង្អែកស្រុកព្រៃឈរ និងមន្ទីរពេទ្យបង្អែក ខេត្តកំពង់ចាម ទាន់ពេលវេលា ។ លោក តូច វុទ្ធី នាយកវិទ្យាល័យ ហ៊ុន សែន ពាមជីកង បានឲ្យដឹងថា រយៈពេល២ថ្ងៃហើយ មានករណីសិស្សដួលសន្លប់ ជាបន្តបន្ទាប់ ពិសេសគឺកូនសិស្សស្រីៗ មានថ្នាក់ទី១០ និងថ្នាក់ទី១២ តែម្តង ។
នៅថ្ងៃទី១០មានសិស្សដួលសន្លប់មានចំនួន៥នាក់ ត្រូវបានព្យាបាល ហើយឈានចូលដល់ព្រឹកថ្ងៃទី១១ នេះដែរ មានកូនសិស្សស្រីដួលសន្លប់រហូតដល់ចំនួន២៣នាក់ ស្ថានភាពនេះ សាលាក៏រាយការណ៍ទៅថ្នាក់ដឹកនាំស្រុក អប់រំស្រុក និងសុខាភិបាលស្រុក ជ្រាបជាព័ត៌មាន និងមានវិធានការណ៍ទប់ស្កាត់ ហើយក៏មានការ សហការ ពីលោក អភិបាលខេត្ត និង មន្ទីរពេទ្យខេត្តចុះអន្តរាគមន៍
ដោយមានរថយន្តសាមុយចំនួន៤គ្រឿង ដឹកជញ្ជូនសិស្សរងគ្រោះដោយជំងឺ ស្ពឹកដៃជើង និងថប់ដង្ហើម យកទៅសង្គ្រោះនៅមន្ទីរពេទ្យបង្អែក ស្រុកព្រៃឈរចំនួន១៦នាក់ និងមន្ទីរពេទ្យបង្អែកខេត្តកំពង់ចាមចំនួន៧នាក់ ក្រោយពេលសំរាកព្យាបាល ឃើញថា កូនសិស្សទាំងនោះបានធូរស្បើយ ជាបន្តបន្ទាប់ហើយ ។ លោកនាយកវិទ្យាល័យក៏បានបញ្ជាក់ដែរថា បញ្ហានេះ ខាងលោកគ្រូពេទ្យជំនាញ របស់មន្ទីរពេទ្យខេត្ត ពុំអាចសន្និដ្ឋានថា យ៉ាងណានោះទេ រង់ចាំការស្រាវជ្រាវសិន ៕
