កំពង់ចាម៖ អភិបាល នៃគណៈអភិបាលខេត្តកំពង់ចាម ឯកឧត្តម គួច ចំរើន បានដឹកនាំកម្លាំងក្រុមការងារមន្ទីរធនធានទឹក និងឧតុនិយមខេត្ត និងក្រុមការងារខេត្ត ចុះត្រួតពិនិត្យ អន្តរាគមន៍ការបូមទឹក ជួយសង្គ្រោះផលស្រូវជូនប្រជាពលរដ្ឋ ជាថ្មីម្ដងទៀត កាលពីរសៀលថ្ងៃទី១០ ខែកក្កដា ឆ្នាំ២០១៧ នៅ
ភូមិព្រីងជ្រុំ ឃុំព្រីងជ្រុំ ស្រុកជើងព្រៃ ខេត្តកំពង់ចាម។
នេះជាលើកទី២ហើយ ដែលឯកឧត្តម គួច ចំរើន បានដឹកនាំក្រុមការងារ ចុះជួយអន្តរាគមន៍ បូមទឹកជួយសង្គ្រោះផលស្រូវ ជូនប្រជាកសិករយើង នៅភូមិព្រីងជ្រុំ ឃុំព្រីងជ្រុំ ស្រុកជើងព្រៃ ខេត្តកំពង់ចាម បើទោះបីជារដូវនេះ មានភ្លៀងធ្លាក់ជាបន្តបន្ទាប់ស្ទើទូទាំងប្រទេស តែតំបន់ខាងលើនេះ គឺមិនទទួលបានទឹកភ្លៀងដូចតំបន់ផ្សេងៗឡើយ ដោយនៅតែមានការខ្វះខាតទឹកដូច្នេះ ពេលនេះក្រុមការងារបានកំពុង ព្យាយាមយ៉ាងសស្រាក់សស្រាំ ដើម្បីដំណើរការមា៉សុីនបូមទឹក ធ្វើយ៉ាងណាជួយសង្គ្រោះផលស្រូវជូនប្រជាពលរដ្ឋ ដែលផ្ទៃដីសរុបត្រូវជួយសង្គ្រោះ គឺមានជាង៦០០ហិតា រហូតមកទល់ពេលនេះ គឺក្រុមការងារបូមទឹកជួយសង្គ្រោះ ផលស្រូវលើផ្ទៃដីបានជាង៣០០ហិតារួចហើយ និងបន្តការជួយសង្គ្រោះលើផ្ទៃដីដែលនៅសេសសល់ផងដែរ។
ប្រជាពលរដ្ឋក៏បានថ្លែងអំណរគុណដល់ក្រុមការងារ ដែលទោះបីជាក្តៅយ៉ាងណា ក៏នៅតែតស៊ូដើម្បីជួយដល់ប្រជាកសិករយើង ដែលកំពុងតែជួបបញ្ហាកង្វះទឹក ដូចពាក្យចាស់លោកពោលថា ធ្វើស្រែនឹងទឹក ធ្វើសឹកនឹងបាយ ៕
