កោះកុង៖ ប្រជាពលរដ្ឋប្រមាណ ជាង១ពាន់គ្រួសារ ដែលរស់នៅភូមិថ្មសឃុំថ្មស ស្រុកបទុម សាគរ នៃខេត្តកោះកុងបានត្អួញត្អែរ និង រិះគន់អ្នកផ្គត់ផ្គង់អគ្គិសនីចំនួន២ម្ចាស់ ដែលមាន ឈ្មោះ កែវ ណារ៉ា និង កាន់ យ៉េង ដែលកំពុងបើកអាជីវកម្មផលិតទឹកកក និង ចែកចាយ ភ្លើងអគ្គិសនីនៅឃុំថ្មស ថាយកតម្លៃគឺថ្លៃហួសហេតុ រហូតដល់ទៅមួយគីឡូវ៉ាត់ ៤ពាន់រៀល។ ក្រុមប្រជាពលរដ្ឋបាននិយាយថា បើអ្នកប្រើប្រាស់ចាប់ពី៣គីឡូវ៉ាត់ចុះក្រោម គឺតម្លៃ១៥,០០០ រៀល ឯណោះហើយបើមានពិធីការ ឬបុណ្យផ្សេងៗ ចង់ប្រើភ្លើង គឺត្រូវបង់ ២០ម៉ឺនរៀលទើប ម្ចាស់ អគ្គិសនីទាំងពីរនេះព្រមភ្ជាប់ភ្លើងឲ្យប្រើ។
ប្រជាពលរដ្ឋបានលើកឡើងទៀតថាសម្រាប់ កុងទ័រភ្លើងវិញតម្លៃរហូតដល់ ៩៥,០០០រៀលដែលវាខ្ពស់ជាងតម្លៃដើម ៣ ទៅ៤ ដងឯណោះ ហើយមិនអាចទិញផ្សេង ពីផ្ទះដែលម្ចាស់ផ្គត់ផ្គង់ភ្លើងបញ្ជាឲ្យទិញនោះឡើយបើមិនដូច្នោះទេ កុងទ័រនេះមិនអាចយកជាការបានទេ ហើយម្ចាស់ភ្លើង មិនភ្ជាប់ភ្លើងឲ្យប្រើប្រាស់ឡើយ។ មិនតែប៉ុណ្ណោះ អ្នកចែកចាយភ្លើងទាំងពីរម្ចាស់ខាងលើតម្រូវឲ្យដូរកុងទ័រក្នុង១ឆ្នាំមិនក្រោម៣ដង ឡើយត្រូវតែដូរ មិនថាកុងទ័រថ្មី ឬចាស់គឺត្រូវតែដូរ ។
ប្រជាពលរដ្ឋទូរទាំងឃុំថ្មស បានឲ្យដឹងថា កន្លងមកអាជ្ញាធរឃុំ ស្រុក ឃើញតែចុះមកត្រួតពិនិត្យ ដែរតែមិនឃើញបានលទ្ធផលទេ។ ប្រជាពលរដ្ឋបានបន្តថា ពួកគាត់សំណូមពរដល់អាជ្ញាធរខេត្តមេត្តាភ្ជាប់បណ្តាញភ្លើង មកដល់ ឃុំថ្មស ផង ពីព្រោះភ្លើងរបស់ឯកជនថ្លៃណាស់ ហើយពួកគេធ្វើអ្វីតាមតែចិត្តនឹកឃើញ ដើម្បី អោយបានចំណូលច្រើន។
ទាក់ទិននិងការរិះគន់ និងត្អូញត្អែររបស់ប្រជាជនដែលរស់នៅឃុំថ្មស អំពីបញ្ហាថ្លៃភ្លើង ថ្លៃកប់ពពកខាងលើនេះ យើងមិនអាចទំនាក់ទំនងទៅកាន់អ្នកម៉ៅការភ្លើង បានទេនៅព្រឹកថ្ងៃទី១១នេះ ដោយទូរស័ព្ទចូល គ្មានអ្នកទទួល ។ ប្រជាពលរដ្ឋទូរទាំង ឃុំថ្មស សូមសំណូមពរដល់ ឯកឧត្តម ប៊ុន លើត អភិបាលខេត្តកោះកុង មេត្តាជួយអន្តរាគមន៍ធ្វើ យ៉ាងណាអោយតម្លៃអគ្គិសនីដែលពួកគាត់ប្រើប្រាស់សព្វថ្ងៃចុះតម្លៃពី ៤,០០០រៀល មកត្រឹម ២,០០០រៀល ។
គួររំលឹកផងដែរថា ឃុំថ្មស ជាឃុំកំណើតរបស់ឧញ្ញ៉ា លី យ៉ុងផាត់ ដូចនេះ ការរំពឹងទុករបស់ប្រជាពលរដ្ឋមានតែលោកឧញ្ញ៉ា ទេ ដែលមានលទ្ធភាពអភិវឌ្ឍន៏ឃុំនេះ ៕
