កំពង់ធំៈ ជាអកុសល់អតីតយុទ្ធជនម្នាក់នេះ បានធ្លាក់ខ្លួនពិការភ្នែក ក្នុងសម័យសង្រ្គាមហើយ បែរជាគ្រោះថ្នាក់ចរាចរណ៍ ក្នុងឆ្នាំ២០១៧បណ្តាលឲ្យកាត់ជើងឆ្វេងម្ខាងបន្ថែមទៀត តែទោះជាខ្លួនពិការពិត តែមិនពិការចិត្ត នៅតែស្មោះស្ម័គ្រជាមួយសម្តេចតេជោ ហ៊ុន សែន ប្រធានសមាគមន៍អតីតយុទ្ធជន កម្ពុជានិងជានាយករដ្ឋមន្រ្តី ដឹកនាំនាវាសន្តិភាពជូនប្រជាជាតិខ្មែរមកដល់ថ្ងៃនេះ។
លោកប៊ុន រ៉ាវុធ គឺជាអតីតយុទ្ធជនម្នាក់ដែលមានចិត្តតស៊ូអង់អាចដើម្បីជាតិមាតុភូមិ ហ៊ានបូជាសាច់ស្រស់ឈាមស្រស់ដើម្បីនាំភាពសុខសាន្តទូទាំងប្រទេស ព្រហ្មលិខិតហាក់បីដូចជាដាក់ទោសឲ្យបុរស ម្នាក់នេះ ទទួលរងនូវកម្មអកុសល់ម្តងហើយម្តងទៀត កាលពីសម័យសង្រ្គាម ជាអតីតយោធានៅអង្គភាពកងពលលេខ២ចាស់ ត្រូវរបួសពិការភ្នែកខាងឆ្វេង នៅសមរភូមិស្រយ៉ង់កោះកេរិ៍ ក្នុងខេត្តព្រះវិហារ នៅឆ្នាំ១៩៩៣លុះមកដល់ ថ្ងៃទី០៩ខែមិថុនាឆ្នាំ២០១៧កន្លងទៅនេះលោក ប៊ុន រ៉ាវុធ បានជួបគ្រោះថ្នាក់ចរាចរណ៍ បណ្តាលឲ្យបាក់និងត្រូវកាត់ជើងខាងឆ្វេងត្រឹមជង្គង់ថែមទៀត ។
លោកប៊ុន រ៉ាវុធ គឺជាអតីតយុទ្ធជន អាយុ៤៦ឆ្នាំ មានភរិយាឈ្មោះយឺន រ៉ា អាយុ៤០ឆ្នាំ មានកូនចំនួន៤នាក់ នៅក្នុងបន្ទុក រស់នៅភូមិត្រាច ឃុំកំពង់ចិនជើង ស្រុកស្ទោង ខេត្តកំពង់ធំ ត្រូវបានទទួលការឧបត្ថម្ភ អង្ករចំនួន៥០គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន១០០.០០០៛ ក្នុងឳកាស ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ព្រមទាំងសហការីចុះសួរសុខទុក្ខ នៅល្ងាចថ្ងៃទី១៩ខែកក្កដាឆ្នាំ២០១៧។
ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមន៍អតីតយុទ្ធជនកម្ពុជាខេត្តកំពង់ធំ បានមានប្រសាសន៍ គោរពថ្លែងអំណរគុណចំពោះសម្តេចតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ដែលបានរៀបចំបង្កើតសមាគមអតីតយុទ្ធជននេះឡើង ដើម្បីងាយស្រួលដឹងសុខ ទុក្ខ របស់អតីតយុទ្ធជន ព្រមទាំងបានជួយដោះស្រាយការលំបាកជូនគាត់បានទាន់ពេលវេលា សូមគោរពជូនពរសម្តេចតេជោ ហ៊ុន សែន និងសម្តេចកិតិព្រឹទ្ឋបណ្ឌឹត ប៊ុន រ៉ានីហ៊ុនសែន និងសូមគាំទ្រសម្តេចលុះអវសាន្តជីវិត ។
ដោយ ប៊ុន រដ្ឋា
