- (ភ្នំពេញ)៖ អភិបាលរងស្រុកសន្ទុក ខេត្តកំពង់ធំ បានត្រូវសមត្ថកិច្ចនគរបាលព្រហ្មទណ្ឌ ក្រសួងមហាផ្ទៃ ឃាត់ខ្លួនកាលពីថ្ងៃទី១៧ ខែកក្កដា ឆ្នាំ២០១៧ ដើម្បីយកមកសាកសួរករណី ស៊ីដាច់លុយជាង២លានដុល្លារអាមេរិក តាមរូបភាពរៀបដីខ្យល់ទំហំ១.៥០០ហិកតា ។
អភិបាលរងរូបនេះឈ្មោះអ៊ឹម ឆន ភេទប្រុស អាយុ៤៣ឆ្នាំ បានត្រូវសមត្ថកិច្ចបញ្ជូនមក អយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី១៩ ខែកក្កដា ឆ្នាំ២០១៧ ដើម្បី ចាត់ការតាមច្បាប់។ រហូតមកទល់រសៀលថ្ងៃទី២០ ខែកក្កដា លោកសៀង សុខ ព្រះរាជអាជ្ញា រងអមសាលាដំបូងរាជធានីភ្នំពេញ កំពុងធ្វើការសាកសួរ។
ប្រភពពីសមត្ថកិច្ចបានអោយដឹងថា ដើមចមក្នុងការឃាត់ខ្លួននេះ កើតឡើងក្នុងអំឡុង ឆ្នាំ២០១៥ ក្នុងខណៈពេលដែលលោកស្រី ហ៊ុន សេងនី បានអោយឈ្មោះអ៊ឹម ឆន រៀបចំដី ចំនួន១.៥០០ហិកតា នៅក្នុងឃុំចំនួន៤ ក្នុងស្រុកសន្ទុក ខេត្តកំពង់ធំ ដោយផ្តល់លុយអោយ ចំនួនជាង២លានដុល្លារអាមេរិក។ រហូតមកដល់អំឡុងខែមេសា ឆ្នាំ២០១៧ ឈ្មោះអ៊ឹម ឆន ពុំបានប្រគល់ប្លង់រឹងមកអោយលោកស្រី ហ៊ុន សេងនី តាមការសន្យាទេ ហើយម្យ៉ាងទៀត ពេលចុះពិនិត្យមើលឃើញថា ពុំបានរៀបចំដីអោយទេ ពោលគឺមានតែនៅលើក្រដាសប៉ុណ្ណោះ៕
