កំពង់ចាម: ឯកឧត្ដម គួច ចំរើន អភិបាល នៃគណៈអភិបាល ខេត្តកំពង់ចាម អមដំណើរដោយ ឯកឧត្ដម អភិបាលរងខេត្ត ព្រមទាំងមន្ត្រីនៃមន្ទីរជំនាញពាក់ព័ន្ធ និងអាជ្ញាធរមូលដ្ឋាន នាព្រឹកថ្ងៃទី២៥ កក្កដា ឆ្នាំ២០១៧ នេះ បានអញ្ជើញចុះពិនិត្យ សិក្សាពីតម្លៃ នៃផ្លូវ១ខ្សែ ប្រវែង ជាង២០គីឡូម៉េត្រ ស្ថិតនៅក្នុងឃុំអារក្ស
ត្នោត ស្រុកស្ទឹងត្រង់ ខេត្តកំពង់ចាម ដើម្បីស្នើសុំកញ្ចប់ថវិកាពីរាជរដ្ឋាភិបាល ក្នុងការអ៊ុតកៅស៊ូ នាចុងឆ្នាំ២០១៧ខាងមុខនេះ។
ឆ្លៀតក្នុងឱកាសនោះដែរ ឯកឧត្តម អភិបាលខេត្ត និងសហការីអមដំណើរ បានចូលថ្វាយបង្គំព្រះសង្ឃ ដែលគង់ចាំព្រះវស្សា នៅវត្តមហោសថសុវណ្ណគីរី ដោយមានការកសាងរូបសំណាកព្រះពុទ្ធបដិមាករធំៗ យ៉ាងស្អាតនៅលើភ្នំ។
ក្រោមការដឹកនាំរបស់ឯកឧត្តម គួច ចំរើន អភិបាលខេត្តកំពង់ចាម ប្រជាពលរដ្ឋដែលរស់នៅក្នុងតំបន់ខាងលើ មានក្តីសង្ឃឹម និងការជឿជាក់ថា ពួកគាត់នឹងទទួលបានផ្លូវកៅស៊ូ១ខ្សែ នាពេលខាងមុខឆាប់ៗនេះមិនខាន ហើយលែងលំបាកក្នុងការធ្វេីដំណេីរ លើផ្លូវរអិលបែកភក់ទៀតហើយ ដ្បិតអីបច្ចុប្បន្នផ្លូវបែកអន្លូងឃុំអារក្សត្នោត ស្រុកស្ទឹងត្រង់ ពិបាកក្នុងការធ្វេីដំណេីរណាស់ នៅពេលដែលមានភ្លៀងធ្លាក់មកម្ដងៗ។
គួររំលឹកផងដែរថា កាលពីព្រឹកថ្ងៃទី១៨ ខែកក្កដា កន្លងទៅថ្មីៗនេះ ក្នុងដំណើរអញ្ជើញចូលរួម ក្នុងកម្មវិធីដាំកូនឈើ នៅស្រុកជើងព្រៃ ឯកឧត្ដម គួច ចំរើន អភិបាលខេត្តកំពង់ចាម អមដំណើរដោយមន្ត្រីជំនាញពាក់ព័ន្ធ បានឆ្លៀតឱកាសចុះពិនិត្យមើលការអ៊ុតកៅស៊ូ ផ្លូវជាតិលេខ៧ ស្ថិតក្នុងទីតាំងស្រុកព្រៃឈរ និងស្រុកកំពង់សៀម ដោយការអ៊ុតកៅស៊ូនេះ នឹងសម្រួលដល់ការធ្វើដំណើររបស់បងប្អូនប្រជាពលរដ្ឋ ដែលឆ្លងកាត់ ផ្លូវនេះ បានកាន់តែស្រួលជាងមុនផងដែរ ៕
