កំពង់ចាម: ដោយយោងតាមច្បាប់ បានហាមឃាត់ ការប្រើប្រាស់ឧបករណ៍ល្មើសច្បាប់នេសាទ និងស្ថិតក្នុងរដូវបិទការនេសាទគ្រប់ប្រភេទផងនោះ សមត្ថកិច្ចនគរបាលខេត្តកំពង់ចាម សហការណ៍ជាមួយកម្លាំងសមត្ថកិច្ចជំនាញ និងអាជ្ញាធរមូលដ្ឋាន បានចុះបង្ក្រាបបទល្មើសនេសាទ និងធ្វើការរឹបអូសនូវឧបករណ៍នេសាទខុសច្បាប់ជាច្រើនកន្លែងផងដែរ។ 
សមត្ថកិច្ចបានឲ្យដឹងថា កាលពីព្រឹកថ្ងៃទី២៧ ខែកក្តដា ឆ្នាំ២០១៧ នេះ កម្លាំងអធិការនគរបាលស្រុកកំពង់សៀម និងកម្លាំងប៉ុស្តិ៍រដ្ឋបាលរអាង សហការណ៍ជាមួយកម្លាំងជំនាញ និងអាជ្ញាធរមូលដ្ឋាន បានចុះបង្ក្រាបបទល្មើសនេសាទមួយកន្លែង ដែលបានដាក់ស្បៃមងក្រឡាញឹកពេញផ្ទៃបឹង និងប្រើប្រាស់ឧបករណ៍ ច្បាប់បានហាមឃាត់ នារដូវបិទការនេសាទ នៅចំណុចបឹងម្រេច ស្ថិតក្នុងភូមិទួលរកា ឃុំរអាង ស្រុកកំពង់សៀម ខេត្តកំពង់ចាម។
ដោយសមត្ថកិច្ចធ្វើការរឹបអូសបាន លបសាច់មងក្រឡាញឹក២៥លប ដែលមានប្រវែង៥០០ម៉ែត្រ ចំណែកជនប្រព្រឹត្តបទល្មើសបាននាំគ្នារត់គេចខ្លួនបាត់ ហើយសមត្ថកិច្ចបានដុតបំផ្លាញ់ចោលនៅនឹងកន្លែងតែម្តង។ដោយឡែក កាលពីព្រឹកថ្ងៃទី២៦ ខែកក្កដា ឆ្នាំ២០១៧ នៅចំណុចស្ទឹងជ្រៅ និងការាស់រលំពោធិ៍ ស្ថិតក្នុងភូមិកំពង់សំណាញ់ ឃុំមៀន ស្រុកព្រៃឈរ ខេត្តកំពង់ចាម កម្លាំងចម្រុះបានចុះបង្ក្រាបបទល្មើសច្បាប់នេសាទ ដោយរឹបអូសបាន លូធ្វើអំពីស្បៃមុងក្រឡាញឹកចំនួន០៤មាត់ ព្រួលប្រវែង៦០ម៉ែត្រ លបប្រើស១០០ចំនួន២១លប ហើយវត្ថុតាងទាំងអស់ត្រូវយកទៅរក្សាទុកនៅផ្ទះប្រធានសហគមន៍ ដើម្បីរង់ចាំចំណាត់ការជាថ្មី។
ដោយឡែកមួយទៀត កាលពីព្រឹកថ្ងៃទី២៦ ខែកក្កដា ឆ្នាំ២០១៧ ដោយអនុវត្តតាមបទបញ្ជាពីលោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម និងមានការឯកភាពពីលោកអភិបាលនៃគណៈអភិបាលស្រុកស្រីសន្ធរ និងនាយខ័ណ្ឌរដ្ឋបាលជលផលខេត្តកំពង់ចាម បានអនុញ្ញាត្តិឲ្យដុតបំផ្លាញចោល នូវឧបករណ៍ល្មើសច្បាប់នេសាទរួមមាន រ៉ាវចំនួន០៧មាត់ លូស្បៃមងក្រឡាញឹកចំនួន០២មាត់ និងព្រួលស្បៃសរុបប្រវែង៩០ម៉ែត្រ។
ដោយឧបករណ៍ល្មើសច្បាប់នេសាទ ដែលត្រូវដុតបំផ្លាញចោលនេះ គឺកម្លាំងនៃអធិការដ្ឋាននគរបាលស្រុកស្រីសន្ធរ បានសហការណ៍ជាមួយរដ្ឋបាលជលផល ចុះបង្ក្រាប និងរឹបអូសបាន កាលពីថ្ងៃទី១៥ ខែកក្កដា កន្លងទៅថ្មីៗ តាមដងទន្លេមេគង្គ នៅចំណុចភូមិសាស្ត្រ ឃុំផ្ទះកណ្តាល ស្រុកស្រីសន្ធរ ហើយបានយកមករក្សាទុកនៅអធិការដ្ឋាន បន្ទាប់មកក៏បានបង្កើតគណះកម្មាធិការដើម្បីធ្វើការដុតបំផ្លាញចោលតែម្តង ៕
