កំពង់ចាម: មនុស្សប្រុសស្រីវ័យចំណាស់២នាក់ និងក្មេងប្រុសអាយុ១០ឆ្នាំម្នាក់ ត្រូវស្លាប់បាត់បង់ជីវិតភ្លាមៗ នៅកន្លែងកើតហេតុ ខណៈដែលជនរងគ្រោះ
បានជិះម៉ូតូ បើកវាជែងរថយន្ត១គ្រឿង ហើយជ្រុលទៅបុកជាមួយរថយន្ត១គ្រឿងទៀត។
ឧបទ្ទវហេតុនេះបានកើតមានឡើង កាលពីវេលាម៉ោង១០ និង១៥នាទីព្រឹក ថ្ងៃទី១៩ ខែសីហា ឆ្នាំ២០១៧ នៅលើកំណាត់ផ្លូវលេខ៧០ សិ្ថតក្នុងភូមិជ្រៃវៀន ឃុំជ្រៃវៀន ស្រុកព្រៃឈរ ខេត្តកំពង់ចាម។
បើយោងតាមសាក្សីនៅកន្លែងកើតហេតុ បានឲ្យដឹងថា គេបានឃើញជនរងគ្រោះជិះម៉ូតូ១គ្រឿង ម៉ាក់ហុងដា សេ១២៥ ពណ៍ខ្មៅ ពាក់ស្លាកលេខ កំពង់ចាម1Q-0742 ដែលជិះមានគ្នា៣នាក់ ហើយបានបើកវារជែងជាមួយនឹងរថយន្តមួយគ្រឿង ហើយក៏បានជ្រុលទៅបុកចំពីមុខរថយន្តម៉ាក់ FRONTIER ពណ៌ស ពាក់ស្លាកលេខភ្នំពេញ2AP-5827 យ៉ាងពេញទំហឹង បណ្តាលឲ្យជនរងគ្រោះទាំង៣នាក់ស្លាប់ភ្លាមៗ នៅនឹងកន្លែងកើតហេតុ ហើយអ្នកបើកបររថយន្តដឹកទំនិញ បានរត់គេចខ្លួនបាត់ភ្លាមៗតែម្ដង។
សមត្ថកិច្ចបានឲ្យដឹងថា ជនរងគ្រោះមានឈ្មោះ ឆាយ ភេទប្រុស អាយុ៥៦ឆ្នាំ មុខរបររត់ម៉ូតូឌុប មានទីលំនៅភូមិបន្ទាយរឹង ឃុំជ្រៃវៀន ស្រុកព្រៃឈរ បានឌុបមនុស្ស២នាក់ពីក្រោយ គឺទី១ឈ្មោះ សុខ ហ៊ាង ភេទស្រី អាយុ៦០ឆ្នាំ និងក្មេងប្រុសឈ្មោះ សុខ លាប អាយុ១០ឆ្នាំ ទាំង២នាក់មានទីលំនៅភូមិទួលតាកោ ឃុំជ្រៃវៀន ស្រុកព្រៃឈរ ដោយឡែកតៃកុងរថយន្តបានរត់គេចខ្លួនបាត់ស្រមោល បន្សុលទុកតែរថយន្តចោលនៅនឹងកន្លែងកើតហេតុ។
បច្ចប្បន្នសមត្ថកិច្ចបានយករថយន្ត និងម៉ូតូជនរងគ្រោះទៅរក្សាទុកនៅអធិការដ្ឋាននគរបាលស្រុកព្រៃឈរ ដើម្បីរង់ចាំដោះស្រាយតាមនីតិវិធី ចំណែកសពជនរងគ្រោះទាំង៣នាក់ ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
