ក្រុងប៉េកាំងៈ ជម្លោះដែនសមុទ្រប្រជុំកោះប៉ារ៉ាសែលបានក្លាយជាទំនាស់យ៉ាងក្តៅគគុក រវាងប្រទេសចិន និងបណ្តាប្រទេសនានារួមទាំងប្រទេសនៅអាស៊ីអាគ្នេយ៍មួយចំនួនផង។ ជម្លោះនេះបានរីករាលដាលដល់មហាអំណាចលើលោក ហើយជារឿយៗពួកគេបានព្រមាន និងគំរាមគ្នាជាច្រើនលើក។
ហេតុនេះទើប ប្រទេសចិន បានអំពាវនាវឲ្យមានភាពចុះសម្រុងគ្នាមួយ សម្រាប់បញ្ហាសន្តិសុខដែនសមុទ្រ ដោយស្នើឲ្យភាគីនៃជម្លោះ ត្រូវតែស្វែងរកដំណោះស្រាយប្រកបដោយសន្តិវិធី។ នៅឯកិច្ចប្រជុំមួយដើម្បីរំលឹកដល់ខួបលើកទី២០ នៃការអនុវត្តអនុសញ្ញារបស់អង្គការសហប្រជាជាតិស្តីពីច្បាប់សមុទ្រ។
លោក Wang Min បាននិយាយថា ប្រទេសចិនយកចិត្តទុកដាក់យ៉ាងខ្លាំងបំផុត ពីសារៈសំខាន់នៃការអភិវឌ្ឍដែនសមុទ្រ ហើយ បានចូលរួមយ៉ាងសកម្មក្នុងកិច្ចការដែនសមុទ្រអន្តរជាតិ និងអំពាវនាវឱ្យមានការកសាងនិងការថែរក្សាសណ្តាប់ធ្នាប់ដែនសមុទ្រ ប្រកបដោយភាពចុះសម្រុងគ្នា និងឯកភាពគ្នា។
សម្រាប់ជម្លោះនានាដែលទាក់ទិននឹងបញ្ហាដែនសមុទ្រ ហើយបណ្តាប្រទេសផ្សេងៗទាមទារលើដែនអធិបតេយ្យភាពរៀងៗខ្លួននោះ រដ្ឋាភិបាលចិនជឿជាក់ថា វិធីដែលល្អ ហើយមានប្រសិទ្ធភាពក្នុងការដោះស្រាយជម្លោះដែនសមុទ្រនោះ គឺការចរចាដោយសន្តិវិធី និងមានការចូលរួមពីភាគីដែលពាក់ព័ន្ធដោយផ្ទាល់ក្នុងជម្លោះ ដោយគោរពតាមប្រវត្តិសាស្ត្រ និងច្បាប់អន្តរជាតិនានា។
សូមរំឭកថា ជម្លោះនៃការទាមទារលើប្រជុំកោះប៉ារ៉ាសែល រួមមានជប៉ុន វៀតណាម ម៉ាឡេស៊ី ហ្វីលីពីន ផងដែរ។ ជម្លោះនេះបានបង្កឲ្យមានការតវ៉ាពីវៀតណាមខ្លាំងក្លាជាងគេ ដោយតាម រយៈកុបកម្មកាលពីខែមុន បណ្តាលឲ្យមានការស្លាប់ជនជាតិចិន៤នាក់ ជាង១៤០នាក់របួស ហើយពលរដ្ឋ និងអ្នកវិនិយោគចិនជាង៥០០០នាក់ត្រុវបានជម្លៀសដឹកតាមកប៉ាល់ និងអមការពារដោយយន្តហោះផងទៅកាន់ប្រទេសចិនវិញ។ បន្ទាប់មក វៀតណាមថានាវាចិនដេញបំបុកទូកនេសាទបណ្តាលឲ្យលិចក្នុងសមុទ្រ ខណៈចិនបានចេញរបាយការណ៍មួយថាទូកវៀតណាមក៏បានបុក និងប៉ះពាល់ទូកនេសាទចិនប្រមាណ១៤០០លើកផងដែរ៕
