ត្បូងឃ្មុំ: ដោយឈើប្រណីតជាច្រើនប្រភេទ ត្រូវបានគេដឹកជញ្ជូនតាមរថយន្តតូចធំ ឆ្លងកាត់ទឹកដីខេត្តត្បូងឃ្មុំ ដើម្បីយកទៅលក់បន្តឲ្យឈ្មួញ ហើយគេតែងតែឃើញកម្លាំងនគរបាល និងកម្លាំងកងរាជអាវុធហត្ថធ្វើការបង្ក្រាប ព្រមទាំងធ្វើការរឹបអូសនូវវត្ថុតាងប្រគល់ឲ្យជំនាញរដ្ឋបាលព្រៃឈើជាបន្តបន្ទាប់ ដែលត្រូវគេសង្ស័យថា លោកគឹម ឈុនលី នាយខ័ណ្ឌរដ្ឋបាលព្រៃឈើខេត្តត្បូងឃ្មុំ កំពុងតែដេកលង់លក់។
ជាក់ស្ដែងកាលពីពេលកន្លងទៅថ្មីៗនេះ កម្លាំងការិយាល័យប្រឆាំងបទល្មើសសេដ្ឋកិច្ចខេត្តត្បូងឃ្មុំ សហការណ៍ជាមួយកម្លាំងកងរាជអាវុធហត្ថស្រុកពញាក្រែក បានធ្វើការបង្ក្រាបស្ទាក់ចាប់រថយន្ត០១គ្រឿង កាលពីវេលាម៉ោង០៩យប់ ថ្ងៃទី១៧ ខែសីហា ឆ្នាំ២០១៧ នៅចំណុចភូមិប្រសិត ឃុំក្រែក ស្រុកពញាក្រែក ខេត្តត្បូងឃ្មុំ ដែលមានបង្កប់ឈើក្រញូង បម្រុងដឹកយកទៅលក់បន្តឲ្យឈ្មួញ ដោយសមត្ថកិច្ចបានធ្វើការឃាត់ខ្លួនអ្នកបើកបរ និងព្រូរថយន្តផងដែរ។
សមត្ថកិច្ចបានឲ្យដឹងថា រថយន្តដែលដឹកបង្កប់ឈើក្រញូងនេះ ម៉ាកតូយូតា(TOYOTA) ហៃយ៉ា ពណ៌ទឹកប្រាក់ ពាក់ស្លាកលេខ សៀមរាប2A-1902 បើកបរដោយឈ្មោះ នួន សុផល ភេទប្រុស អាយុ៤៩ឆ្នាំ រស់នៅភូមិជាំទ្រៀក ឃុំត្រមូង ស្រុកមេមត់ និងព្រូរថយន្តម្នាក់ទៀតឈ្មោះ ភឿង ភាង ភេទប្រុស អាយុ២៦ឆ្នាំ 
រស់នៅឃុំជីរោទិ៍ទី២ ស្រុកត្បូងឃ្មុំ បានដឹកឈើប្រណិត ប្រភេទក្រញូង ចំនួន៥៤ដុំ ស្មើនឹង៣១៨គីឡូក្រាម ដែលបម្រុងយកទៅលក់ឲ្យឈ្មួញ ដោយគ្មានលិខិតអនុញ្ញាត។
បច្ចុប្បន្នជនសង្ស័យទាំង២នាក់ រួមជាមួយវត្ថុតាង ត្រូវបានសមត្ថកិច្ចនគរបាល ប្រគល់ឲ្យជំនាញរដ្ឋបាលព្រៃឈើ ដើម្បីចាត់ការបន្តតាមនីតិវិធីច្បាប់។
សូមបញ្ជាក់ផងដែរថា រយៈពេលប៉ុន្មានខែចុងក្រោយនេះ សមត្ថកិច្ចនគរបាលខេត្តត្បូងឃ្មុំ បានបង្ក្រាបរថយន្តដឹកឈើប្រណីត ប្រគល់ឲ្យជំនាញរដ្ឋបាលព្រៃឈើ ចំនួន៦គ្រឿងហើយ ៕
