ត្បូងឃ្មុំ: បុរសម្នាក់ត្រូវបានស្លាប់បាត់បង់ជីវិតភ្លាមៗនៅកន្លែងកើតហេតុ និងម្នាក់ទៀតត្រូវរងរបួសយ៉ាងធ្ងន់ធ្ងរ ខណៈដែលជនរងគ្រោះបានជិះម៉ូតូដោយមិន
ប្រកាន់ស្កាំ ហើយត្រូវរថយន្តដឹកស៊ីម៉ងត៍សណ្តោងរ៉ឺម៉កបើកបុកពេញទំហឹង។
ហេតុការណ៍នេះបានកើតមានឡើងកាលពីវេលាម៉ោង០៩ និង១៥នាទីយប់ ថ្ងៃទី២៤ ខែសីហា ឆ្នាំ២០១៧នៅចំណុចគល់ស្ពានគីហ្សូណាត្រើយខាងកើត ស្ថិតនៅក្នុងភូមិទន្លេបិទលើ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។
បើកយោងតាមសាក្សីនៅកន្លែងកើតហេតុបានឲ្យដឹងថា គេបានឃើញបុរស២នាក់ជិះម៉ូតូ១គ្រឿង ម៉ាក ហុងដាឌ្រីម ពណ៌ខ្មៅ ពាក់ផ្លាកលេខ ភ្នំពេញ1D-6467 បើកបរក្នុងទិសដៅពីកើតទៅលិច ដោយមិនប្រកាន់ស្កាំ ខណៈមកដល់ត្រង់ចំណុចកើតហេតុ ស្រាប់តែមានរថយន្តដឹកស៊ីម៉ងត៍១គ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3D- 7288 ដោយមានសណ្តោងរ៉ឺម៉កផងនោះ បានបុកជាមួយម៉ូតូពេញទំហឹង បណ្ដាលឲ្យជនរងគ្រោះដែលជាអ្នកបើកបរម៉ូតូឈ្មោះភិន សារ៉ាន់ ភេទប្រុស អាយុ៣០ឆ្នាំ មានទីលំនៅភូមិថ្មី ឃុំពាមប្រធ្នោះ ស្រុកកោះសូទិន បានស្លាប់បាត់បង់ជីវិតភ្លាមៗនៅកន្លែងកើតហេតុ និងអ្នករួមដំណើរពីក្រោយឈ្មោះ ឡាយ លីហ័រ ភេទប្រុស អាយុ២៥ឆ្នាំ រស់នៅភូមិថ្មី ឃុំពាមប្រធ្នោះ ស្រុកកោះសូទិន ខេត្តកំពង់ចាម ត្រូវរងរបួសធ្ងន់ និងត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ ដោយឡែកអ្នកបើកបររថយន្តបានរត់គេចខ្លួនបាត់ភ្លាមៗផងដែរ។
ក្រោយពីកើតហេតុ មន្ត្រីនគរបាលចរាចរណ៍ បានចុះទៅធ្វើការអន្តរាគមន៍សម្រួលចរាចរណ៍ និងបញ្ជូនជនរងគ្រោះទៅកាន់មន្ទីរពេទ្យ ហើយបានធ្វើការស្រាវជ្រាវរកសាច់ញាតិរបស់អ្នកស្លាប់ ឲ្យមកទទួលយកសាកសព ទៅធ្វើរបុណ្បតាមប្រពៃណី។
បច្ចុប្បន្ន វត្ថុតាងទាំងម៉ូតូរបស់ជនរងគ្រោះ និងរថយន្តបង្ក ត្រូវបានយកទៅរក្សាទុកនៅអធិការដ្ឋាននគរបាលស្រុកត្បូងឃ្មុំ ដើម្បីរង់ចាំដោះស្រាយជាក្រោយ ៕
