ភ្នំពេញ ៖ ជនសង្ស័យម្នាក់ត្រូវបានប្រជាពលរដ្ឋឃាត់ខ្លួនបន្ទាប់ពីធ្វើសកម្មភាពចូលក្នុងផ្ទះរបស់ ប្រជាពលរដ្ឋលួចយកទ្រព្យសម្បត្តិ ដែលហេតុការណ៍នេះបានកើតឡើងកាលពីវេលាម៉ោង០១ និង៣០នាទី រំលងអាធ្រាតឈានចូលថ្ងៃទី១៣ខែមិថុនាឆ្នាំ២០១៤នៅត្រង់ចំណុចផ្លូវលេខ
132Z ស្ថិតក្នុងសង្កាត់ទឹកល្អក់១ខណ្ឌទួលគោក។
ជនសង្ស័យមានឈ្មោះ សេង វិចិត្រ អាយុ៣៣ឆ្នាំមុខរបរអ្នកអូសបន្លែនៅផ្សារដើមគរ ស្នាក់នៅម្តុំផ្សារដើមគរ និងមានស្រុកកំណើតនៅឃុំស្វាយជ្រុំ ស្រុកស្វាយជ្រុំ ខេត្តស្វាយរៀង។
ប្រភពពត័មានពីប្រជាការពារបានអោយដឹងថា ខណៈដែលរូបគាត់កំពុងដើរល្បាតស្រាប់តែ ប្រទះឃើញជនសង្ស័យម្នាក់បានកំពុងរត់តាមផ្លូវក៏មានការសង្ស័យ ហើយក៏បានឃាត់សួរនាំ ទើបដឹងថា ជនសង្ស័យគឺបានចូលទៅលួចទ្រព្យសម្បត្តិក្នុងផ្ទះប្រជាពលរដ្ឋមួយកន្លែង ហើយត្រូវ បានម្ចាស់ផ្ទះគេដឹងទាន់ក៏ដេញតាម រហូតរត់មកដល់ចំណុចកើតហេតុក៏ត្រូវប្រជាការពារឃាត់ខ្លួន បានតែម្ដង។
បន្ទាប់ពីកើតហេតុជនសង្ស័យត្រូវបានសមត្ថកិច្ចបញ្ជូនទៅកាន់ប៉ុស្ដិ៍នគរបាលទឹកល្អក់១ ដើម្បី ធ្វើការសាកសួរនិងកសាងសំណុំរឿងបញ្ជូនទៅតុលាការផ្ដន្ទាទោសតាមនីតិវិធីច្បាប់៕
