កំពង់ចាម: ដោយអនុវត្តន៍តាមគោលការណ៍បញ្ញាាតិច្បាប់ របស់ក្រសួងកសិកម្ម រុក្ខាប្រមាញ់ និងនេសាទ ក្នុងការបង្ក្រាបទប់ស្កាត់រាល់បទល្មើស
នេសាទខុសច្បាប់គ្រប់ប្រភេទ ជាពិសេសក្នុងរដូវបិទការនេសាទ នារដូវត្រីពងកូន កម្លាំងជំនាញ នៃខណ្ឌរដ្ឋបាលជលផលខេត្តកំពង់ចាម បានសហការណ៍ជាមួយកងកម្លាំងអាជ្ញាធរមូលដ្ឋាន បើកយុទ្ធនាការយ៉ាងក្ដៅគគុក ក្នុងការបង្ក្រាបបទល្មើសនេសាទ ដោយធ្វើការរឹបអូសនូវឧបករណ៍ខុសច្បាប់ដុតបំផ្លាញចោល ព្រមទាំងរំដោះកូនត្រីចម្រុះចាក់ព្រលែងចូលបឹងធម្មជាតិវិញផងដែរ។
ជាក់ស្តែង កាលពីព្រឹកថ្ងៃទី២៦ ខែសីហា ឆ្នាំ២០១៧ កម្លាំងខណ្ឌរដ្ឋបាលជលផលខេត្តកំពង់ចាម បានសហការណ៍ជាមួយកម្លាំងប៉ុស្តិ៍នគរបាលរដ្ឋបាលច្បារអំពៅ ចុះធ្វើការបង្ក្រាបបទល្មើសនេសាទខុសច្បាប់ នៅចំណុចបឹង ស្ថិតនៅក្នុងឃុំច្បារអំពៅ ស្រុកបាធាយ ខេត្តកំពង់ចាម។
សមត្ថកិច្ចបានឲ្យដឹងថា ជាលទ្ធផលក្នងការបង្ក្រាបនេះ កម្លាំងចម្រុះបានធ្វើការរឹបអូសបាននូវឧបករណ៍ខុសច្បាប់រួមមាន លូសៃស្បៃមុងចំនួន៣៩មាត់ របាំងស្បៃមុង១៩៥០ម៉ែត្រ និងបង្គោលចំនួន៥៨៥ដើម ព្រមទាំងបានចាក់ព្រលែងកូនត្រីចម្រុះចូលបឹងធម្មជាតិវិញ ចំនួន១១៧គីឡូក្រាម ចំណែកសម្ភារៈឧបករណ៍បទល្មើសទាំងនោះ ត្រូវបានកាប់កំទេចចោលនៅក្នុងទឹកតែម្តង។
ដោយឡែក នៅព្រឹកថ្ងៃទី២៥ ខែសីហា ឆ្នាំ២០១៧ កម្លាំងជំនាញ នៃខណ្ឌរដ្ឋបាលជលផលខេត្តកំពង់ចាម បានសហការណ៍ជាមួយកម្លាំងប៉ុស្តិ៍នគរបាលរដ្ឋបាលព្រែកកុយ ប៉ុស្តិ៍រាយប៉ាយ និងប៉ុស្តិ៍រដ្ឋបាលកងតាណឹង រួមជាមួយកម្លាំងសហគមន៍នេសាទ បានចុះបង្ក្រាបបទល្មើសនេសាទខុសច្បាប់ នៅក្នុងភូមិសាស្ត្របឹងB6 ស្ថិតក្នុងឃុំព្រែកកុយ ឃុំរាយប៉ាយ និងឃុំកងតាណឹង ស្រុកកងមាស ខេត្តកំពង់ចាម។
សមត្ថកិច្ចបានឲ្យដឹងថា ជាលទ្ឋផលក្នុងការបង្ក្រាបនេះ កម្លាំងចម្រុះបានធ្វើការរឹបអូសបាននូវឧបករណ៍ខុសច្បាប់រួមមាន លូស្បៃមុងចំនួន៨៥មាត់ ព្រួលស្បៃមុងប្រវែង៤២៥០ម៉ែត្រ បង្គោលចំរឹងចំនួន១២៧៥ដើម ព្រមទាំងបានចាក់ព្រលែងកូនត្រីចម្រុះចូលបឹងធម្មជាតិវិញ ចំនួន១៧០គីឡូក្រាម ចំណែកសម្ភារៈឧបករណ៍បទល្មើសនេសាទទាំងនោះ ត្រូវដុតបំផ្លាញចោលនៅលើទំនប់អូឈូក ឃុំស្តៅ ផ្ទាល់តែម្តង ៕
