កំពង់ធំៈ តំបន់ប្រតិបត្តិការសឹករងកំពង់ធំ កោះប្រជុំនាយទាហាន ដើម្បីផ្សព្វផ្សាយសេចក្ដីថ្លែងការណ៍របស់រាជរដ្ឋាភិបាល ចុះថ្ងៃទី០៣ខែកញ្ញា ឆ្នាំ២០១៧ ស្តីពីការចាប់ខ្លួន លោកកឹម សុខា ក្នុងការប្រព្រឹត្តិបទល្មើសជាក់ស្ដែង ឃុបឃិតជាមួយជនបរទេសជាសម្ងាត់ និងចារកម្ម ដែលប៉ះពាល់ដល់សន្តិសុខនៃរដ្ឋ ដែលជាអំពើក្បត់ជាតិ។
ពីធីនេះត្រូវបានធ្វើឡើងនៅ ព្រឹក ថ្ងៃទី០៣ខែកញ្ញា ឆ្នាំ២០១៧ ក្រោមអធិបតីភាព ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការណ៍សឹករងកំពង់ធំនៅសាលប្រជុំបញ្ជាការដ្ឋានតំបន់ប្រតិបត្តិការសឹករងកំពង់ធំ បានកោះប្រជុំនាយទាហាន នាយទាហានរង ដែលជាថ្នាក់ដឹកនាំតាមលំដាប់ថ្នាក់ ដើម្បីផ្សព្វផ្សាយឲ្យបានជ្រាបតាមបណ្តាកងឯកភាព ត្រៀមខ្លួនជាស្រេច ប្រឆាំងដាច់ខាតចំពោះ ជនណាមានបំណងចង់ផ្តួលរំលំរាជរដ្ឋាភិបាលស្របច្បាប់។
នៅល្ងាចថ្ងៃដដែល ឧត្តមសេនីយ៍ត្រី សោម ស៊ុន បានបន្តដំណើរចុះត្រួតពិនិត្យ កម្លាំងត្រៀមបម្រុងអន្តរាគមន៍ របស់អង្គភាពវរសេនាតូចថ្មើរជើងលេខ១ នៃតំបន់សឹករងកំពង់ធំ និងផ្សព្វផ្សាយសេចក្តីថ្លែងការណ៍របស់រាជរដ្ឋាភិបាល ស្តីពីការចាប់ខ្លួន ឈ្មោះ កឹម សុខា ដែលមានបំណងផ្តួលរំលំរាជរដ្ឋភិបាលស្របច្បាប់ ដែលជាអំពើក្បត់ជាតិ ក្នុងឱកាសចុះត្រួតពិនិត្យកម្លាំងនេះ ឯកឧត្តម សុខលូ អភិបាលខេត្តកំពង់ធំ និងជាប្រធានគណបញ្ជាការឯកភាពរដ្ឋបាលខេត្ត បានឧបត្ថម្ភ នូវអង្ករចំនួន២៥០គីឡូក្រាម មីយើងចំនួន ២០ កេស សម្រាប់ជូនដល់កងកម្លាំងវេសេនាតូចថ្មើរជើងលេខ១។
កងកម្លាំងទាំងអស់ បានប្តេជ្ញាថា យើងខ្ញុំទាំងអស់គ្នាជានាយទាហាននាយទាហានរងនិងពលទាហានទាំងអស់ចំណុះឲ្យបញ្ជាកាដ្ឋានតំបន់ប្រតិបត្តិការសឹករងកំពង់ធំ នៃយោធភូមិភាគទី៤ សូមប្រកាសគាំទ្រយ៉ាងពេញទំហឹង នូវចំណាត់ការរបស់រាជរដ្ឋាភិបាលក្នុងការចាប់ខ្លួនលោកកឹម សុខា និងសូមឲ្យតុលាការមេត្តាអនុវត្តន៍តាមនិតិវីធី ផ្តន្ទាទោសតាមច្បាប់ ដើម្បីធ្វើឲ្យប្រទេសជាតិយើងមានសន្តិភាព និងបន្តដំណើរការអភិវឌ្ឍន៍។
មហាជនជាច្រើននាក់ បានហួសចិត្តនឹងសំដីរបស់ លោក គឹម សុខា ដែលបានលើកឡើងថា លោកខំតស៊ូអស់រយះពេល២០ឆ្នាំហើយដើម្បីប្រឆាំងនិងផ្តួលរំលំរាជរដ្ឋាភិបាលស្របច្បាប់ ដែលដឹកនាំដោយសម្តេចតេជោ ហ៊ុន សែន ដែលវាផ្ទុយពីការខិតខំរបស់សម្តេចអគ្គមហាសេនាតីតេជោ ហ៊ុន សែន ដែលបានខំតស៊ូជិត៤០ឆ្នាំ តាំពីបាតដៃទទេ ដើម្បីទាមទារសន្តិភាព និងការអភិវឌ្ឍន៍ប្រទេសជាតិឲ្យមានភាពរីកចម្រើន និងប្រជាពលរដ្ឋមានសុខសុវត្តិភាព រហតមកដល់ពេលនេះ ។ដោយ ប៊ុន រដ្ឋា 
