ការបោះឆ្នោតជុំទីពីរ ដើម្បីជ្រើសតាំង ប្រធានាធិបតី អាហ្វហ្គានីស្ថាន នឹង ប្រព្រឹត្តទៅនៅថ្ងៃសៅរ៍ សប្តាហ៍នេះ។ មន្ត្រីទទួលបន្ទុកបញ្ហាសន្តិសុខ បានដាក់ពង្រាយកង កម្លាំងរបស់ខ្លួននៅទូទាំងប្រទេស ដើម្បីការពារការអុកឡុកពីសំណាក់ពួកឧទ្ទាមតាលីបង់ ដែលបានគម្រាមថា នឹងបង្កការរំខានមិនឲ្យការបោះឆ្នោតប្រព្រឹត្តទៅបានសម្រេចឡើយ។
នៅថ្ងៃព្រហស្បតិ៍ ទី១២ ខែមិថុនា នេះ ផ្នែកសន្តិសុខរបស់ប្រទេសអាស៊ីខាងត្បូងមួយនេះ បានអះអាងថា នឹងការពារសន្តិសុខឲ្យបានសម្រាប់ការបោះឆ្នោតនៅថ្ងៃសៅរ៍ ខាងមុន។ ទោះ បីជាបញ្ហាសន្តិសុខ នៅតែបន្តគម្រាមកំហែងប្រជាជន អាហ្វហ្គានីស្ថាន ជាប់ជានិច្ចក៏ដោយ ក៏ ពួកគេត្រូវតែជម្នះទៅធ្វើការបោះឆ្នោត សម្រាប់អនាគត និង ជីវិតថ្មីរបស់ពួកគេ។
អ្នកនាំពាក្យក្រសួងការពារជាតិ អាហ្វហ្គានីស្ថាន លោក ហ្សាហឺ អាហ្ស៊ីមី បាននិយាយថា “យើងបានដាក់ពង្រាយកងកម្លាំងនៅទីតាំងផ្សេងៗគ្នាទូទាំងប្រទេស ហើយយើងបានត្រៀម គ្រប់ជ្រុងជ្រោយនូវកិច្ចការពារសន្តិសុខសម្រាប់ការបោះឆ្នោតជុំទីពីរនេះ។” គួរបញ្ជាក់ថា បេក្ខជនដណ្តើមតំណែងប្រធានាធិបតីចំនួនពីររូប កំពុងតែបន្តយុទ្ធនាការ ឃោសនារកសម្លេងឆ្នោត
របស់ខ្លួនជាធម្មតា ហើយប្រជាពលរដ្ឋក៏បានត្រៀមខ្លួនទៅបោះ ឆ្នោត ដែលទើបតែកើតមានជាលើកទីមួយក្នុងប្រវត្តិសាស្ត្រនេះដែរ។ កាលពីពេលថ្មីនេះ ក្រុមតាលីបង់ បានចេញសេចក្តីថ្លែងការណ៍មួយថា ពួកគេនឹងនៅតែបន្ត ការវាយប្រហារលើកងកម្លាំងរក្សាសន្តិសុខ ហើយបន្ថែមពីនេះគឺ ពួកគេបានអំពាវនាវមិនឲ្យ ប្រជាពលរដ្ឋទៅបោះឆ្នោតឡើយ។
យ៉ាងណាក៏ដោយ រដ្ឋាភិបាល បានចេញសេចក្តីថ្លែង ការណ៍តបវិញថា ស្ថានការណ៍គ្រប់យ៉ាងគឺស្ថិតនៅក្រោមការគ្រប់គ្រង ហើយប្រជាពលរដ្ឋ មិនត្រូវមានការព្រួយបារម្ភអ្វីឡើយ។
