កំពង់ធំ៖ ព្រៃលិចទឹកគឺមានសារៈសំខាន់ សម្រាប់ការផ្តល់ជម្រកដល់មឆ្ឆាជាតិ ធ្វើការពងកូន និងបន្តពូជ តែត្រូវបានឈ្មួញមួយចំនួន បានប៉ុនប៉ងម្តងហើយម្តងទៀត ដើម្បីលេបត្របាក់ឈូសឆាយ ភ្ជួរកំទេចព្រៃដើម្បី វាទទីយកដីដែលត្រូវបានហាមឃាត់ ពីរាជរដ្ឋាភិបាលយកមកធ្វើជាកម្មសិទ្ធ ទោះជាត្រូវបានផ្តន្ទាទោស ក៏ឈ្មួញទាំងនេះ នៅតែពុំមានការរាងចាល ដែលត្រូវបានគេដឹងថា មានការឃុបឃិតពីមេឃុំជាអ្នកបើកភ្លើងខៀវ។
សកម្មភាពឈ្មួញការភ្ជួរដីព្រៃលិច ត្រូវបានលោកវរៈសេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថ ស្រុកស្ទោង ដឹកនាំកំលាំមន្ត្រីក្រោមឳវាទ ចុះបង្ក្រាបនៅរសៀលថ្ងៃទី ១៣ ខែ មិថុនា ឆ្នាំ ២០១៤ នៅចំនុចភូមិសាស្ត្រឃុំ សព្រោជ ស្រុកស្ទោង ខេត្តកំពង់ធំ ព្រមទាំងរឹបអូសបាន ត្រាក់ទ័រ ចំនួន៤គ្រឿង ព្រមទាំងតៃ កុងត្រាក់ទ័រចំនួន ៦នាក់ ទី១ឈ្មោះ ហង្ស ហេន ភេទប្រុស អាយុ ៣១ឆ្នាំ ទី២ ឈ្មោះ បិន សុភាព ភេទប្រុស អាយុ ២៥ឆ្នាំ ទី៣ ឈ្មោះ សំ ថា ភេទប្រុស អាយុ ២២ឆ្នាំ ទី
៤ ឈ្មោះ សុំ គី ភេទ ប្រុស អាយុ ៣៧ឆ្នាំ ទី៥ឈ្មោះ កែវ គឿន ភេទប្រុស អាយុ ២៣អ្នកទាំង៥នាក់នេះរស់នៅភូមិទួលជ្រៃ ឃុំ សំពៅលូន ស្រុកសំពៅលូន ខេត្តបាត់ដំបង ឆ្នាំ ទី៦ ឈ្មោះ លី លីម ភេទប្រុស អាយុ ៥១ឆ្នាំ រស់នៅភូមិ ប្រនិត ឃុំ សំព្រោជ ស្រុកស្ទោង ខេត្តកំពង់ធំ ជនសង្ស័យទាំង៦នាក់ ត្រូវបានកងរាជអាវុធហត្ថស្ទោង ប្រគល់ឲ្យលោក ប៉ែន វណ្ណរិទ្ធ នាយខណ្តរដ្ឋបាល ជលផលកំពង់ធំ ទទួលយកទាំងមនុស្ស និងវត្ថុតាងត្រាក់ទ័រ៤គ្រឿង ដើម្បីកសាងសំណុំ រឿងបញ្ជូនទៅតុលាការ ។
លោក វរៈសេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោង បានឲ្យដឹងថា មុនឈានដល់ការ ឃាត់ត្រាក់ទ័រ៤គ្រឿងនេះ លោកបានទទួលសេចក្តីរាយការណ៍ ពីប្រជាពលរដ្ឋថាមានឈ្មួញមួយក្រុមកំពុងតែធ្វើសកម្មសភាព ភ្ជួរដីព្រៃលិចទឹក នៅតំបន់២ និងតំបន់៣ ដែលជាចំនុចត្រូវបានហាមឃាត់ ដាច់ខាតមិនឲ្យបុគ្គលណាម្នាក់ រំលោភបំពានបានឡើយ ទើបលោក បានសុំយោបល់លោក ឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ ដើម្បីសុំគោលការណ៍ ចុះបង្ក្រាបនិងស្ទាក់ចាប់ជនល្មើសដែលកំពុង តែធ្វើសកម្មភាពរំលោភបំពានដីព្រៃលិចទឹក ក្នុងគោលបំណងថែរក្សាធនធានធម្មជាតិ និងមឆ្ឆាជាតិ ឲ្យមានទីជម្រកសម្រាប់បន្តពូជទៅថ្ងៃក្រោយ ។
ប្រភពពត៌មាន បានឲ្យដឹងថា បន្ទាប់ពីបើកយុទ្ធនាការ ចុះបង្ក្រាបគ្រឿងចក្រអ៊ិចស្ការឈូសឆាយដីព្រៃលិចទឹកកន្លងមក ព្រមទាំងចាប់ឈ្មួញនិងជនឃុបឃិត រួមទាំងថ្នាក់ដឹកនាំមួយចំនួន ថែមទាំងចាប់បានគ្រឿងចក្រជិត១០០គ្រឿងក្នុងនោះក៏មានឈ្មោះ ពាញ ពូល ផងដែរបន្ទាប់មកស្ថានភាពការឈូសឆាយបាន ស្ងាត់ មួយរយះទៅ តែពេលនេះត្រូវបានឈ្មួញចាប់ផ្តើមកំរើកសារជាថ្មី ដោយបានខ្ចីដៃប្រជាពលរដ្ឋ ជាច្រើននាក់ ឲ្យដើរតួជាអ្នកម្ចាស់ដី សម្រាប់ការប្រឆាំតវ៉ានិងការចាប់គ្រឿងចក្រត្រាក់ទ័រ តែកាពិតគឺជាឈ្មួញដដែលៗ និងលេងបៀរបីសន្លឹកដដែល ។
ចំណែកប្រភពពត៌មានពីប្រជាពលរដ្ឋ បានឲ្យដឹងថាកាលពីពេលថ្មីៗនេះ លោកមេឃុំសព្រោជ បានឲ្យមេភូមិទាំងអស់មកប្រជុំ ថាឲ្យប្រជាពលរដ្ឋនាំគ្នាទៅចាប់ដីនៅវាលក្រោមដើម្បី ធ្វើស្រែ ព្រោះរាជរដ្ឋាភិបាលឲ្យធ្វើវិញហើយ ទើបពួកគាត់ក៏នាំគ្នាទៅចាប់ចងដីរាងខ្លួន ឲ្យតែបានភ្ជួរម្តងគឺជា ទ្រព្យរបស់យើងហើយ ហើយថ្ងៃក្រោយមានក្រុមហ៊ុនគេនឹងប្រមូលទិញវិញ ហើយកាចាប់ដីនេះគឺមានការ យល់ព្រមពីលោក ពាញ ពូល ជាមេឃុំ ។
ចំណែកលោក ពាញ ពូល មេឃុំសព្រោជ បានឲ្យដឹងថា ដីដែលភ្ជួរ នោះគឺជាដីរបស់ប្រជាពលរដ្ឋមែន ចំនែកសរុបជាហិចតា គឺមិនអាចសរុបបានទេ ដោយសារតែគាត់ ដើរភ្ជួរ ដូចស្បែកខ្លា កន្លែងណាមើលទៅវាលល្អអាចលក់បានថ្លៃគាត់ នាំគ្នាភ្ជួរទៅ ។ 
