ត្បូងឃ្មុំ: បុរសជាចុងភៅម្នាក់ ដែលបានបាត់ខ្លួនដោយត្រូវចរន្តខ្សែទឹកហូរគួចប៉ើងធ្លាក់ចូលទៅក្នុងព្រែក គ្រាដែលជនរងគ្រោះបានជិះម៉ូតូឆ្លងកាត់ទឹកដែលកំពុងហូរលិចស្ពាន កាលពីវេលាម៉ោង២រំលងអាធ្រាត្រ ឈានចូលថ្ងៃទី២០ ខែ
កញ្ញា ឆ្នាំ២០១៧ នៅចំណុចស្ពានព្រែកតាខ្វាន់ ស្ថិតក្នុងភូមិទួលគរ ឃុំទន្លេបិទ ស្រុក-ខេត្តត្បូងឃ្មុំ ហើយសាកសពជនរងគ្រោះត្រូវបានរកឃើញកាលពីវេលាម៉ោង៦និង១៥នាទីព្រឹក ថ្ងៃទី២១ ខែកញ្ញាពោលគឺរយៈពេលជាង២៨ម៉ោង ដែលមានចម្ងាយប្រមាណជា២០០ម៉ែត្រពីកន្លែងកើតហេតុ។
សមត្ថកិច្ចបានឲ្យដឹងថា ជនរងគ្រោះមានឈ្មោះប៉ូច ប៉ាវ ភេទប្រុស អាយុ២៤ឆ្នាំ ជាតិខ្មែរ នៅភូមិកំពង់ស្ដីលើ ឃុំកំពង់រាប ស្រុកកោះសូទិន ខេត្តកំពង់ចាម។
ក្រោយពីទទួលបានព័ត៌មាន កម្លាំងជំនាញនៃអធិការដ្ឋាននគរបាលស្រុកត្បូងឃ្មុំ សហការណ៏ជាមួយប៉ុស្តិនគរបាលរដ្ឋបាលទន្លេបិទ ពេទ្យមណ្ឌលសុខភាពទន្លេបិទ បានចុះដល់កន្លែងកើតហេតុ ដើម្បីធ្វើការស្រាវជ្រាវពិនិត្យសព ដោយឃើញថាជនរងគ្រោះពិតជាបានស្លាប់ដោយសារលង់ទឹកពិតប្រាកដមែន គឺពុំមានជាប់ពាក់ព័ន្ធលើបទល្មើសព្រហ្មទ័ណ្ឌឡើយ ហើយសពត្រូវបានប្រគល់ទៅឲ្យក្រុមគ្រួសារយកទៅធ្វើបុណ្បតាមប្រពៃណី។
គួររំលឹកផងដែរថា បុរស២នាក់មានមុខរបរជាចុងភៅលក់គ្រឿងក្លែម ដោយម្នាក់មានឈ្មោះ ប៉ូច ប៉ាវ អាយុ២៤ឆ្នាំ និងម្នាក់ទៀតឈ្មោះ ធូ ចាន់ឌី អាយុ២៨ឆ្នាំ រស់នៅភូមិចុងព្រែក ឃុំមហាលាប ស្រុកកោះសូទិន ខេត្តកំពង់ចាម ពួកគាត់ទាំង២នាក់ បានជិះម៉ូតូមួយគ្រឿង ម៉ាកហុងដាសេ១២៥ សេរីឆ្នាំ២០១៤ ដឹកគ្នាពីហាងផឹកសីុ យីហោចំប៉ីស (គល់ស្ពានគីហ្សូណាត្រើយទន្លេបិទ) ឆ្ពោះទៅលេងស្រុកកំណើត នៅស្រុកកោះសូទិន ក្រោយចប់ការងារនៅវេលាម៉ោង១២យប់ លុះធ្វើដំណើរដល់ចំណុចស្ពាន ព្រែកតាខ្វាន់ ភូមិទួលគរ ឃុំទន្លេបិទស្រុកត្បូងឃ្មុំ នៅវេលាម៉ោង២រំលងអាធ្រាត្រ ឈានចូលថ្ងៃទី២០ ខែកញ្ញា ឆ្នាំ២០១៧ ជនរងគ្រោះឈ្មោះ ប៉ូច ប៉ាវ បានឲ្យឈ្មោះធូ ចាន់ឌី ដែលជិៈពីរក្រោយចុះដើរ ចំណែកគាត់ បានជិះម៉ូតូយ៉ាងលឿនឆ្លងកាត់ទឹកដែលកំពុងហូរលិចស្ពាន ឆ្ពោះទៅត្រើយម្ខាង បណ្ដាលឲ្យបើុងគួចតាមចរន្តទឹក លិចទៅបាត់ទាំងមនុស្សនិងម៉ូតូ។
លុះព្រឹកឡើងក្រុមគ្រួសារសាច់ញាតិជនរងគ្រោះ បានរាវរកឃើញម៉ូតូរបស់ជនរងគ្រោះវិញ ចំណែកជនរងគ្រោះ ត្រូវបានជួលបងប្អូនខ្មែរឥស្លាមឲ្យមុជទឹករាវរកបន្ដទៀត រហូតដល់ព្រឹកថ្ងៃទី២១ ខែកញ្ញា ពោលគឺរយៈពេលជាង២៨ម៉ោងទើបប្រទះឃើញសពជនរងគ្រោះ ហើយទទួលយកទៅធ្វើរបុណ្បតាមប្រពៃណី ៕
