កំពង់ចាម: យុទ្ធនាការរបស់រាជរដ្ឋាភិបាលយ៉ាងក្តៅគគុគ ក្នុងការអនុវត្តន៍និងការបង្ក្រាបបទល្មើសជលផលគ្រប់ប្រភេទ ជាក់ស្តែងនៅព្រឹកថ្ងៃទី២២ខែ
កញ្ញា ឆ្នាំ២០១៧នេះ លោក ផេន សុផល អភិបាលនៃគណៈអភិបាលស្រុកកោះសូទិន បានដឹកនាំកម្លាំងប្រដាប់អាវុធទាំង៣ ចុះបង្រា្កបបទល្មើសនេសាទដោយខុសច្បាប់ នៅចំណុចអតីតឡូតិ៍លេខ៨ ស្ថិតក្នុងភូមិសាស្ត្រ ឃំុមហាលាភ ស្រុកកោះសូទិន ដោយសហការជាមួយកម្លាំងរដ្ឋបាលជលផលខេត្តកំពង់ចាម និងកម្លាំងជំនាញការិយាល័យប្រឆាំងបទល្មើសសេដ្ឋកិច្ចខេត្តកំពង់ចាម។
សមត្ថកិច្ចបានឲ្យដឹងថា ជាលទ្ធផលក្នងការបើកប្រតិបត្តិការណ៍បង្ក្រាបនេះ កម្លាំងចម្រុះបានធ្វើការដកហូតបាននូវឧបករណ៍ខុសច្បាប់រួមមាន ១-ឧបករណ៍លូស្បៃមុង លូស្បៃមុងចំនួន១២៥មាត់ របាំងស្បៃមុងប្រវែង៥៦២៥ម៉ែត្រ បង្គោលចម្រឹងឬស្សីចំនួន២១២៥ដើម និងកូនត្រីចម្រុះទម្ងន់៥៧៥គីឡូក្រាម។
២-ឧបករណ៍ រ៉ាវ-រ៉ាវចំនួន០៨មាត់ របាំងប្រវែង៣៥០ម៉ែត្រ បង្គោលឬស្សីចំនួន១២០ដើម និងកូនត្រីចម្រុះទម្ងន់២៤គីឡូក្រាម។
៣-របាំងបិទផ្ចិតព្រែក-របាំងផ្ចិតព្រែកចំនួន០៥កន្លែង បង្គោលចំនួន១២០ដើម របាំងព្រួលប្រវែង៩០ម៉ែត្រ លបទ្រចំនួន២០គ្រឿង និងកូនត្រីចម្រុះចំនួន៣០គីឡូក្រាម។
ចំពោះឧបករណ៍វត្ថុតាងមួយចំនួន ត្រូវបានកាប់បំផ្លាញចោលនៅកន្លែង និងមួយចំនួនទៀត ត្រូវយកទៅរក្សាទុកនៅរដ្ឋបាលស្រុកកោះសូទិន ដោយឡែកកូនត្រីចម្រុះ ត្រូវបានចាក់ព្រលែងចូលបឹងធម្មជាតិវិញ ៕
