ត្បូងឃ្មុំ: គម្រោងមូលនិធិឃុំ-សង្កាត់ ឆ្នាំ២០១៧ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ក្នុងការជួសជុល និងសាងសង់ផ្លូវនៅតាមមូលដ្ឋាន ដែលបានដាក់ឲ្យដេញថ្លៃផ្លូវចំនួន៤ខ្សែ កាលពី
ព្រឹកថ្ងៃទី២៨ ខែកញ្ញា ឆ្នាំ២០១៧ នៅសាលាស្រុកអូរាំងឪ ខេត្តត្បូងឃ្មុំ ត្រូវបានគេមើលឃើញថា មានភាពសុក្រិត និងយុត្តិធម៌ ដែលអាចទទួលយកបាន ទន្ទឹមនឹងនោះឃើញថា មានភាពរញ៉េរញ៉ៃបន្តិច ព្រោះការចរចារដើម្បីរកផលប្រយោជន៍ របស់ក្រុមហ៊ុនម៉ៅការមិនត្រូវរ៉ូវគ្នាសោះ។
នាឱកាសនោះដែរ លោកងួន ប៊ុណ្ណា អភិបាលស្រុកអូរាំងឪ បានស្នើរសុំឲ្យតំណាងក្រុមហ៊ុនទទួលការទាំងអស់ ដែលមានវត្តមានចូលរួមក្នុងការដេញផ្លៃនេះ គឺសូមឲ្យមានការដេញថ្លៃដោយសេរី និងយុត្តិធម៌ ហើយត្រូវដាក់សំណើដេញថ្លៃឲ្យបានគ្រប់ៗគ្នា ជៀសវាងការឃុបឃិតគ្នាក្នុងរូបភាពណាមួយជាដាច់ខាត ព្រោះនេះជាកញ្ចប់ថវិការបស់ជាតិ ដែលបានទម្លាក់ចុះមកឲ្យឃុំ ដើម្បីធ្វើការអភិវឌ្ឍក្នុងមូលដ្ឋាន ដូច្នេះការដេញថ្លៃធ្វើយ៉ាងណា ត្រូវឲ្យមានតម្លាភាព និងការសាងសង់ផ្លូវឲ្យត្រូវតាមស្តង់ដារលក្ខណៈបច្ចេកទេសផងដែរ។
ក្នុងនោះដំណើរការនៃការដេញថ្លៃ ត្រូវបានប្រព្រឹត្តទៅដោយរលូន ១-គឺគម្រោងសាងសង់ផ្លូវក្រាលគ្រួសក្រហមប្រវែង២.០៥ គ.ម និងដាក់លូមុខកាត់១០០០មម ចំនួន១កន្លែង របស់ឃុំគងជ័យ ក្នុងតម្លៃទឹកប្រាក់ប៉ាន់ស្មានជាង៨៤លានរៀល ត្រូវបានក្រុមហ៊ុន សាម ស្រ៊ិន ធ្វើការដេញយកក្នុងតម្លៃជាង១៥លានរៀល។
២-គម្រោងសាងសង់ផ្លូវក្រាលគ្រួសក្រហមប្រវែង១.៥៥ គ.ម និងដាក់លូមុខកាត់០.៨ម ចំនួន១កន្លែង របស់ឃុំចក ក្នុងតម្លៃទឹកប្រាក់ប៉ាន់ស្មានជាង៦៤លានរៀល ត្រូវបានក្រុមហ៊ុន កេត ម៉េងឡាយ ធ្វើការដេញយកក្នុងតម្លៃជាង២២លានរៀល។
៣-គម្រោងសាងសង់ផ្លូវក្រាលគ្រួសក្រហមប្រវែង២.២៥ គ.ម របស់ឃុំដំរិល ក្នុងតម្លៃទឹកប្រាក់ប៉ាន់ស្មានជាង៦៦លានរៀល ត្រូវបានក្រុមហ៊ុន គុជ វាសនា ធ្វើការដេញយកក្នុងតម្លៃជាង១៥លានរៀល។
និង៤-គម្រោងសាងសង់ផ្លូវក្រាលគ្រួសក្រហមប្រវែង១.៩៨ គ.ម និងដាក់លូមុខកាត់០,៦ម ចំនួន១កន្លែង របស់ឃុំទួលសុភី ក្នុងតម្លៃទឹកប្រាក់ប៉ាន់ស្មានជាង៦៦លានរៀល ត្រូវបានក្រុមហ៊ុន សាម ស្រ៊ិន ធ្វើការដេញយកក្នុងតម្លៃជាង១៥លានរៀល។
ដោយការដាក់ដេញថ្លៃគម្រោងសាងសង់ផ្លូវលំទាំង៤ឃុំខាងលើ បានដំណើរការដោយរលូន ព្រមទាំងមានតម្លៃធ្លាក់ចុះជាងពាក់កណ្ដាលផងនោះ ប្រធានគណៈកម្មាការម្ចាស់លទ្ធកម្មឃុំ បានធ្វើការប្រកាសទទួលយកដោយរីករាយ ហើយសង្ឃឹមថាក្រុមហ៊ុនអ្នកទទួលការទាំងអស់ ត្រូវអនុវត្តន៍ការងារសាងសង់ផ្លូវ ឲ្យមានគុណភាព និងត្រូវតាមស្តង់ដារ លក្ខណៈបច្ចេកទេសផងដែរ ៕
