កំពង់ធំៈ លោកអនុសេនីយ៍ត្រីសាន ជា ត្រូបានបានថ្នាក់ដឹកនាំនៃបញ្ជាករដ្ឋានតំបន់ប្រតិបត្តិការសឹករងកំពង់ធំ យកចិត្តទុកដាក់ ពីជីវភាពរស់នៅនាពេលបច្ចុប្បន្ន ដែលមានជីវភាពក្រីក្រី និងពុំមានលទ្ធភាព សាងសង់ជម្រកស្នាក់នៅបានសមរម្យ ទើបឯកឧត្តម នាយឧត្តមសេនីយ៍ គន់ គីម អគ្គលេខាធិការសមាគម អតីតយុទ្ធជនកម្ពុជា និងជាអគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិមិន្ទ បានឲ្យមេបញ្ជាការតំបន់ប្រតិបត្តិការសឹករងកំពង់ធំ រៀបចំចាត់ចែងសាងសង់លំនៅដ្ឋាន ជូននាយទាហានរូបនេះ ដើម្បីឲ្យមានជម្រកស្នាក់នៅសមរម្យ ។
ក្រោយពីសាងសង់ផ្ទះមួយខ្នងរួចរាល់ ដែលជាខ្នងផ្ទះលើកទី ៤៧ អំណោយដ៏ថ្លៃថ្លារបស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា បានផ្តល់ជូន លោកអនុសេនីយ៍ត្រីសាន ជា មេបញ្ជាការកងអនុសេនាតូចលេខ១ កងអនុសេនាធំលេខ២ វរសេនាតូចថ្មើរជើងលេខ១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ នៅវេលាម៉ោង៨,១៥នាទីព្រឹកថ្ងៃទី០៦ខែតុលា ឆ្នាំ២០១៧។
ពីធីប្រគល់ផ្ទះមួយខ្នងនេះ គឺបានដឹកនាំដោយ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិ បត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្ត រួមទាំងសហការី បានប្រគល់ផ្ទះមួយ ខ្នង ដែលបានសាងសង់អំពីឈើ ទំហំ ៤គុណ ៦ ជញ្ជាំងក្តា ប្រកស័ង្ខសី ដែលត្រូវចំណាយថវិកាក្នុងការសាងសង់អស់ទឹកប្រាក់ចំនួន ៧, ៨៩០.០០០៛ នៅក្នុងពិធី បានផ្ដល់ជូនគាត់នូវអង្ករចំនួន៥០គីឡូក្រាម មីយើងចំនួន២ កេស ទឹកត្រីទឹកស៊ីអ៊ីវពីរយួរ និងថវិកាចំនួន១០០.០០០៛ បន្ថែមទៀត ស្ថិតនៅភូមិពាមគ្រែង ឃុំ ក្តីដូង ស្រុកកំពង់ស្វាយ ខេត្តកំពង់ធំ ។
លោកអនុសេនីយ៍ត្រីសាន ជា និងក្រុមគ្រួសារ ព្រមទាំងអាជ្ញាធរដែនដី និងប្រជាពលរដ្ឋ ចូលរួមអបអរសាទរចំពោះលោកសាន ជា ដែលបានទទួលផ្ទះថ្មីនេះ និងសូមគោរពថ្លែងអំណរគុណដ៍ជ្រាលជ្រៅបំផុតចំពោះសម្តេចតេជោហ៊ុន សែន ដែលជានិច្ចកាលតែងតែយកចិត្តទុកដាក់គិតគូរដល់សុខទុក្ខ ជីវភាពរស់នៅ របស់យោធិនគ្រប់រូប និងអតីតយុទ្ធជន ដែលជួបការលំបាកខ្វះខាតផងដែរ និងសូមប្តេជ្ញាស្មោះត្រង់ រក្សាសន្តិភាព និងការអភិវឌ្ឍន៍ ក្រោមការដឹកនាំដ៏ឈ្លៀសវៃរបស់សម្តេច និងគាំទ្រឲ្យសម្តេចហ៊ុន សែន បន្តដឹកនាំជានយក រដ្ឋមន្រ្តីគ្រប់អណ្ណត្តិបន្តទៀត។
ដោយ ប៊ុន រដ្ឋា
