កំពង់ចាម: បន្ទាប់ពីទទួលបានសេចក្ដីរាយការណ៍ ពីអ្នកយកព័ត៌មានKhemaradaily ដែលបានបង្ហាញពីទីតាំង និងឧបករណ៍បទល្មើសនេសាទជាច្រើន ត្រូវបានគេប្រើប្រាស់ក្នុងការចាប់យកកូនត្រីគ្រប់ប្រភេទ នៅចំណុចទំនប់រលំពោធិ ស្ថិតក្នុងភូមិកំពង់សំណាញ់ ឃុំមៀន ស្រុកពៃឈរ ខេត្តកំពង់ចាម រួចមកលោក អ៊ុក ណារិន នាយខ័ណ្ឌរដ្ឋបាលជលផលខេត្តកំពង់ចាម បានដឹកនាំកម្លាំងក្រោមឱវាទចុះបង្ក្រាបភ្លាមៗតែម្ដង កាលពីរសៀលថ្ងៃទី៩ ខែតុលា ឆ្នាំ២០១៧នេះ ដោយបានធ្វើការរឹបអូស និងកាប់បំផ្លាញចោលនូវឧបករណ៍បទល្មើសនេសាទមួយចំនួន ព្រមទាំងរំដោះកូនត្រីចម្រុះចាក់ព្រលែងចូលបឹងធម្មជាតិវិញផងដែរ។
ដោយកន្លងមកប្រជាពលរដ្ឋដែលធ្វើការនេសាទដោយស្របច្បាប់ បានលើកឡើងថា សព្វថ្ងៃនេះពួកគាត់បានទៅបង់សំណាញ់ ដើម្បីយកត្រីមកស្លរសម្រាប់ហូបតែក្នុងគ្រួសារ សឹងតែមិនគ្រប់គ្រាន់ផង ដោយឧបករណ៍បទល្មើសនេសាទពេញផ្ទៃបឹងតែម្ដង ហើយក្នុងឧបករណ៍និមួយៗមានរាប់សិបម៉ែត្រ និងមានដាយរាប់រយកន្លែងទៀតផង។
ក្រោយពីទទួលបានព័ត៌មានខាងលើនេះតាមរយៈអ្នកយកព័ត៌មានយើង ប្រចាំនៅខេត្តកំពង់ចាមរួចមក នាយខ័ណ្ឌរដ្ឋបាលជលផលខេត្តកំពង់ចាម លោកអ៊ុក ណារិន បានដឹកនាំកម្លាំងជំនាញ និងសហគមន៍នេសាទ ចុះបង្ក្រាបបទល្មើសនេសាទ នៅចំណុចទំនប់រលំពោធិ ដោយបានធ្វើការរឹបអូស និងកាប់បំផ្លាញចោលនូវឧបករណ៍ល្មើសច្បាប់រួមមាន លូស្បៃមុងចំនួន០៩មាត់ របាំងលូស្បៃមុងប្រវែង២២៥ម៉ែត្រ បង្គោលចម្រឹងចំនួន១៣៤ដើម និងចាក់ព្រលែងកូនត្រីចម្រុះទម្ងន់១៨គីឡូក្រាមចូលក្នុងបឹងធម្មជាតិវិញ បន្ទាប់មកកម្លាំងបានបន្តចុះរុះរើរបាំងរ៉ាវចំនួន០២កន្លែងស្មើនឹង២៨ម៉ែត្រ បង្គោលចម្រឹងចំនួន៤០ដើម លបចំនួន០៥គ្រឿង និងចាក់ព្រលែងត្រីចម្រុះទម្ងន់០៣គីឡូក្រាមចូលក្នុងបឹងធម្មជាតិវិញផងដែរ ៕
