កងទ័ពអ៊ីរ៉ាក់អ៊ីរ៉ងនិងអាមេរិក បានត្រៀមវាយបកទៅក្រុមឧទ្ទាមអ៊ីស្លាម នៅភាគខាងជើងប្រទេស។ កងទ័ពអ៊ីរ៉ាក់ដណ្តើមក្រុងចំនួន៣ នៅជិតក្រុងបាកដាត មកកាន់កាប់វិញ។ រដ្ឋាភិបាលអ៊ីរ៉ង់បានប្រកាសថា ត្រៀមសហការជាមួយអាមេរិក ដើម្បីប្រយុទ្ធនឹងក្រុមជីហាត។ នៅថ្ងៃសៅរ៍នេះដែរ អង់គ្លេសបានប្រកាសផ្តល់ជំនួយមនុស្សធម៌ជាបន្ទាន់ ជាទឹកប្រាក់៣លាន៧សែនអឺរ៉ូ សម្រាប់ប្រជាជនអ៊ីរ៉ាក់ដែលភៀសខ្លួន ពីការប្រយុទ្ធ នៅភាគខាងជើងប្រទេស។ កាលពីថ្ងៃសុក្រ ប្រធានាធិបតីអាមេរិកបានប្រកាស ពិនិត្យលើជំរើសគ្រប់បែបយ៉ាងដែលអាមេរិកអាចធ្វើ ដើម្បីជួយកងទ័ពអ៊ីរ៉ាក់ ប្រឈមនឹងក្រុមឧទ្ទាមរដ្ឋអ៊ីស្លាមអ៊ីរ៉ាក់។
ក្រុមឧទ្ទាមអ៊ីស្លាមនេះ ចង់បង្កើតរដ្ឋអ៊ីស្លាមមួយ នៅព្រំដែនជាប់ស៊ីរី។ ក្នុងសប្តាហ៍នេះ ក្រុមជីហាតនេះ បានដណ្តើមកាន់កាប់ដែនដីមួយចំនួនធំ នៅភាគខាងជើងអ៊ីរ៉ាក់ ក្នុងនោះមានខេត្តនីនីវ និងក្រុងសំខាន់ម៉ូស៊ូល ដែលនៅស្ថិតក្នុងខេត្តនេះ ក្រុងទីគ្រីត រួមនឹងតំបន់ផ្សេងៗទៀត។ ពេលនេះ ក្រុមជីហាតកំពុងបន្តទិសដៅដើម្បីវាយយកក្រុងបាកដាត ពីរដ្ឋាភិបាល។ ដោយឡែក សាក្សីជាច្រើនបានប្រាប់ថា ក្រុមជីហាតត្រៀមវាយលុកក្រុងសាម៉ារ៉ា ជាក្រុងអ្នកកាន់និកាយស៊ុននីតផងដែរ។
ក្រុងនេះរងនូវសង្គ្រាមសហគមន៍ អស់២ឆ្នាំ។ ប៉ូលិសបានប្រាប់ថា រកឃើញសាកសពប៉ូលិស១២នាក់ ឆេះខ្លោច នៅតំបន់អ៊ីស្ហាក់គី ក្នុងខេត្តសេឡាហេឌីន ជិតក្រុងបាក់ដាត។ កាលពីថ្ងៃសុក្រ អាយ៉ាតូឡា អាលី ស៊ីស្តានី ជាប្រមុខសាសនានិកាយស៊ីអ៊ីតអ៊ីរ៉ាក់ ដ៏មានឥទ្ធិពល បានអំពាវនាវអោយប្រជាជន អោយកាន់អាវុធចូលទប់ទល់ជាមួយក្រុមជីហាត។ ខណៈរដ្ឋាភិបាលចេញផែនការសន្តិសុខការពារក្រុងបាកដាត នាយករដ្ឋមន្ត្រីអ៊ីរ៉ាក់ ម៉ាឡាគី បានគូសបញ្ជាក់ថា រដ្ឋាភិបាលបានផ្តល់អំណាចគ្មានព្រំដែនកំណត់ ដល់រូបលោក ដើម្បីកំចាត់ក្រុមឧទ្ទាម។ ប្រឈមនឹងក្រុមជីហាត អ៊ីរ៉ង់ដែលនៅជិតខាងក្បែរនោះ បានប្រកាសត្រៀមខ្លួនសហការជាមួយអាមេរិក ករណីអាមេរិកបើកប្រតិបត្តិការប្រយុទ្ធក្រុមជីហាត។
អ៊ីរ៉ង់ប្រាប់ថា បានផ្តល់ទីប្រឹក្សាយោធាច្រើនរូប ជួយរដ្ឋាភិបាលស៊ីរី ប្រយុទ្ធក្រុមឧទ្ទាម ហើយបានទទួលជោគជ័យច្រើនដងហើយ ហើយអ៊ីរ៉ង់អាចនឹងធ្វើផែនការប្រឆាំងក្រុមឧទ្ទាមជាថ្មីទៀត។ ប៉ុន្តែ ពេលនេះ អ៊ីរ៉ង់បដិសេធមិនធ្វើអន្តរាគមន៍នៅអ៊ីរ៉ាក់ទេ លើកលែងតែរដ្ឋាភិបាលអ៊ីរ៉ាក់ស្នើសុំអ៊ីរ៉ង់ ហើយការស្នើសុំអោយអ៊ីរ៉ង់ជួយនេះគឺត្រូវផ្អែកលើមូលដ្ឋានច្បាប់ អន្តរជាតិ និងបំណងរបស់ប្រជាជនអ៊ីរ៉ាក់។ ប្រធានាធិបតីអាមេរិកវិញបានរំលឹកអ៊ីរ៉ាក់ថា មិនត្រូវរង់ចាំសកម្មភាពណាមួយពីអាមេរិកទេ ហើយអន្តរាគមន៍យោធាណាក៏ដោយ ក៏ជួបបរាជ័យដែរ ប្រសិនបើគ្មានការប្រឹងប្រែងផ្នែកនយោបាយ។ លោកអូបាម៉ាបានបន្ទោសរដ្ឋាភិបាលលោកម៉ាឡាគីថាមិនព្រមជួយអោយសហគមន៍ និកាយស៊ុននីតបានចូលរួមប្រឡូកឆាកនយោបាយទូលំទូលាយ ដូចក្រុមអ្នកកាន់និកាយស៊ីអ៊ីត៕
