កំពង់ធំ ៖ បុរស២នាក់រងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ កាលពីវេលាម៉ោង២០និង៣០ នាទីយប់ ថ្ងៃទី១៣ ខែ តុលា ឆ្នាំ ២០១៧ នៅលើកំណាត់ផ្លូវជាតិលេខ ៦ ចន្លោះគីឡូម៉ែត្រលេខ១៤៣-១៤៤ ភូមិជ័យមង្គល ឃុំជ្រាប់ ស្រុកសន្ទុក ខេត្តកំពង់ធំ។
តាមប្រភពពត័មានពីសមត្ថកិច្ចបានអោយដឹងថា ករណីគ្រោះថ្នាក់ចរចរណ៍នេះបណ្ដាលមកពីរថយន្ដបែកកង់ហើយចត ចោលមិនមានដាក់ផ្លាកសញ្ញា ឬចំណាំងផ្លាតរួមផ្សំនឹងម៉ូតូមានល្បឿនលឿនផង ធ្វើអោយអ្នកបើកបរ ម៉ូតូ បើកបុករថយន្តពីក្រោយពេញទំហឹង ក្នុងទឹសដៅស្របគ្នាពី ត្បូងទៅជើង បណ្ដាលអោយរងរបួសធ្ងន់ទាំង២នាក់។
ម៉ូតូម៉ាកហុងដាម៉ាក់ MSX ពណ៌ក្រហម ពាក់ផ្លាកលេខភ្នំពេញ1AF.6453 បើកបរដោយឈ្មោះ ស៊ន.គឹមសាន ភេទប្រុស អាយុ ២៩ឆ្នាំ ស្នាក់នៅភូមិថ្នល់កែង ឃុំអូរអណ្តូង ស្រុកសាលាក្រៅ ខេត្តប៉ៃលិន(របួសធ្ងន់)(ពាក់មួកសុវត្ថិភាព) និងអ្នករួមដំណើរជាមួយ ឈ្មោះ យា.ខី ភេទស្រី អាយុ ២៦ឆ្នាំ នៅភូមិរលួស សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ(របួសធ្ងន់)(មិនពាក់មួកសុវត្ថិភាព) ចំណែករថយន្ត(ដឹកដី) ម៉ាក ទីតាន់ ពណ៌ខៀវ ពាក់ផ្លាកលេខកំពង់ធំ3A.0699 បើកបរដោយឈ្មោះ ផាត.ធន់ម៉ាន ភេទប្រុស អាយុ ២១ឆ្នាំ ស្នាក់នៅភូមិអន្លង់ក្រសាំង ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។
ក្រោយកើតហេតុសមត្ថកិច្ចបានឃាត់ខ្លួនអ្នកបើកបររថយន្ដ ព្រមទាំងវត្ថុតាង បញ្ចូនទៅអធិការដ្ឋាននគរបាលស្រុកសន្ទុក ដើម្បីរក្សាទុក រងចាំដោះស្រាយគ្នា តាមក្រោយ៕ប៊ុន រិទ្ធី
