តាកែវ ៖ បុរសពីរនាក់ដោយសារបើកបរខ្វះការប្រុងប្រយ័ត្នបានជួបគ្រោះចរាចរដោយចៃដន្យនិងរងរបួសធ្ងន់ធ្ងរបន្ទាប់ពីពួកគេបើកម៉ូតូ វ៉ាជែងក្នុងស្ថានភាពគ្រោះថ្នាក់ ទៅបុកជាមួយនិងរថយន្តដឹកដីមួយទំហឹងចំពីមុខ។
ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង១៦និង២០នាទី ថ្ងៃទី១៤ ខែតុលា ឆ្នាំ២០១៧ នៅតាមបណ្តោយផ្លូវជាតិលេខ២ ត្រង់ចន្លោះគីឡូម៉ែត្រលេខ៩៩-១០០ ស្ថិតនៅភូមិកំពង់ជ្រៃ ឃុំស្មោង ស្រុកទ្រាំង ខេត្តតាកែវ។ តាមសាក្សីដែលបានឃើញហេតុការណ៍បានប្រាប់ឲ្យដឹងថា នៅមុនពេលកើតហេតុគេបានឃើញជនរងបើកម៉ូតូម៉ាកវ៉េវ ពណ៌ខ្មៅ ដោយមិនមានពាក់មួកសុវត្ថិភាព បានបើកមកពីទិសខាងត្បូងទៅជើង ស្រាប់តែមកដល់កន្លែងកើតហេតុបានបើកវ៉ាជែងរថយន្តមួយគ្រឿងនៅខាងមុខក៏ជ្រុលចង្កូតទៅបុកជាមួយនិងរថយន្តដឹកដី ដែលបើកមកពីជើងទៅត្បូង(ច្រាសទិសគ្នា)ចំពីមុខពេញទំហឹងបណ្តាលឲ្យរងរបួសធ្ងន់ទាំង០២នាក់។ចំណែកសមត្ថកិច្ចដែលបានចុះទៅដល់កន្លែងកើតហេតុឲ្យដឹងថាជនរងគ្រោះមានឈ្មោះ យុត ស៊ុយ ភេទប្រុស អាយុ២៦ឆ្នាំ បើកបរម៉ូតូម៉ាកវ៉េវ ពណ៌ខ្មៅ គ្មានស្លាកលេខ រស់នៅភូមិសំរោង ឃុំរមេញ ស្រុកកោះអណ្តែត ខេត្តតាកែវ និងអ្នករួមដំណើរម្នាក់ឈ្មោះ សុខ រី ភេទប្រុស អាយុ២២ឆ្នាំ រស់នៅភូមិកន្ទួតធំ ឃុំត្រឡាច ស្រុកទ្រាំង ខេត្តតាកែវ។
ក្រោយពេលកើតហេតុអ្នកបើកបររថយន្តបានរត់គេចខ្លួនបាត់ស្រមោល ចំណែកជនរងគ្រោះត្រូវបានសមត្ថកិច្ចបញ្ជូនទៅសង្រ្គោះបន្ទាន់នៅឯមន្ទីរពេទ្យបង្អែងខេត្តតាកែវ ដោយឡែករថយន្តនិងម៉ូតូត្រូវបានសមត្ថកិច្ចជំនាញយកទៅរក្សាទុកនៅអធិការដ្ឋាននគរបាលស្រុកទ្រាំងរងចាំដោះស្រាយនៅពេលក្រោយ៕
