បើទោះបីរដូវបិទនេសាទ បានចូលមកដល់ គិតត្រឹមថ្ងៃទី១៥ ខែមិថុនា ឆ្នាំ២០១៤ មានរយះ ពេល១៥ថ្ងៃមកហើយ ប៉ុន្តែបទល្មើសនេសាទ ដោយប្រើឧបករណ៏ឆក់ត្រី និងការដាក់របាំង សាច់អួន ស្ទាក់ចាប់ត្រី ត្រូវបានគេមើលឃើញថា កំពុងតែបន្តសកម្មភាព យ៉ាងអនាធិបតេយ្យ
នៅក្នុងដែននេសាទ ស្រុកជលគីរី ខេត្តកំពង់ឆ្នាំង ។
ប្រភពព័តមាន បានបន្តអោយដឹងទៀតថា រដូវបិទនេសាទ គឺជារដូវត្រីពងកូន បើយោងតាមច្បាប់រដ្ឋបាលជលផល ហាមឃាតដាច់ខាត ក្នុងការប្រើប្រាស់ឧបករណ៍នេសាទ ដោយទ្រុងទ្រាយធំ។ ប្រជាពលរដ្ឋរស់នៅក្នុងស្រុកគីរី បានអះអាងថា មានជនខិលខូចមួយចំនួន បានលួចបន្ត ធ្វើការនេសាទចាប់ត្រី ដោយទ្រុងទ្រាយធំ នៅក្នុងដែននេសាទ ស្រុកជលគីរី ចាប់តាំងពីព្រែកសេះ រហូតដល់ព្រែកកោះរការ របាំងសាច់អួនទាំងនេះ គឺមានម្ចាស់ជនជាតិវៀតណាម ជាអ្នកចេញលុយទិញឧបករណ៏ និង រត់ការបិទបាំងភ្នែកសមត្តកិច្ច ដែលចុះទៅកាន់តំបន់នោះ ។ ដោយឡែកការនេសាទ ដោយប្រើឧបករណ៏ឆក់ក្តៅ និងឆក់ត្រជាក់ ត្រូវបានគេប្រទះឃើញជារៀងរាល់យប់ រាល់ថ្ងៃ និងមានពេលខ្លះ ពួកគេបានឆ្មក់ ចូលទៅឆក់ត្រីនៅក្នុងតំបន់ហាមឃាតទៀតផង។ កន្លែងឆក់ត្រីដែលក្រុមជនល្មើស ចូលទៅឆក់ត្រីជាប្រចាំ គឺតំបន់អភិរក្ស អតីតះ ឡូលេខ១០ បឹងប្រា ។ ការនេសាទល្មើសច្បាប់បានយ៉ាងរលូន គឺដោយមានឈ្មួញ ទិញត្រីជនជាតិវៀតណាម ឈ្មោះ ហ្វាង យុំាងគូរ ជាអ្នកចេញថ្លៃឧបករណ៏ និងលុយថ្លៃ រត់ការឲ្យសមត្ថកិច្ច ជំនាញពាក់ពន្ធ័ដូចជា នគរបាលបុស្តិ៍ រដ្ឋបាល នគរបាលចរាចរណ៏ជើងទឹក និងជំនាញសង្កាត់រដ្ឋបាលជលផលជាដើម ។
ជារៀងរាល់ថ្ងៃ គេសង្កេតឃើញការណូត ទិញត្រីរបស់លោក ហ្វាង យុំាងគូរ ចំនួន២គ្រឿង បានប្រមូលទិញត្រីឆក់ និងត្រីដាក់របាំងលបសាច់អួនទំនើប ក្នុងរដូវបិទនេសាទ ដឹកជញ្ជូនយកទៅលក់បន្ត នៅលំដ្ឋានភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ។
ពាក់ពន្ធ័ពត័មានខាងលើ នាយខណ្ឌរដ្ឋបាលជលផល ខេត្តកំពង់ឆ្នាំង បានអះអាងថា ករណីនេះ លោកបានទទួលពត័មានរួចមកហើយ លោកដាក់ពាក្យបណ្តឹង ទៅតុលាការ ដើម្បីកោះហៅមេខ្លោង ដែលសកម្ម យកមកអប់រំ និងធ្វើកិច្ចសន្យាបញ្ឈប់ និងរៀបចំកម្លាំង ចុះបង្ក្រាបបណ្ដើៗផងដែរ ៕
