ភ្នំពេញ ៖ បុរសម្នាក់រួមនិងកូនប្រុសម្នាក់បានរងរបួសធ្ងន់ស្រាល ខណៈជិះម៉ូតូសណ្ដោងរ៉ឺម៉ក ដឹកផ្លែត្របែកបញ្ច្រាស់ផ្លូវ ហើយត្រូវរថយន្តហ៊ីយ៉ាន់ដាយធុនធំបើកគារនិងកិនគាបជាប់ កាលពី វេលាម៉ោង៩និង២០នាទីយប់ថ្ងៃទី១៥ខែមិថុនាឆ្នាំ២០១៤ ត្រង់ចំណុចក្បែរក្រោមស្ពានអាកាស
ក្បាលថ្នល់ ស្ថិតតាមបណ្ដោយផ្លូវព្រះមុនីវង្ស ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញបុរសម្នាក់ បានជិះម៉ូតូសណ្ដោងរ៉ឺម៉កមានដឹកផ្លែត្របែកនិងកូនប្រុសម្នាក់ពីលើរ៉ឺម៉ក ធ្វើដំណើរតាមបណ្ដោយ ផ្លូវព្រះមុនីវង្សក្នុងទិសដៅពីកើតទៅលិចបញ្ច្រាស់ផ្លូវ ខណៈនោះក៏មានរថយន្តហ៊ីយ៉ាន់ដាយធុនធំ មួយគ្រឿង ពាក់ស្លាកលេខ ភ្នំពេញ 3B-8398 ធ្វើដំណើរតាមបណ្ដោយផ្លូវព្រះមុនីវង្ស ទិសដៅពី លិចទៅកើតឆ្ពោះឡើងស្ពានព្រះមុនីវង្សថ្មី ក៏បានបើកគាររ៉ឺម៉កនិងកិនគាបជាប់ធ្វើអោយបុរស ជាឪពុករងរបួសធ្ងន់ ចំណែកកូនរងរបួសស្រាល។
បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍និងបញ្ជូនជនរងគ្រោះទៅមន្ទីរពេទ្យ ភ្លាមៗ និងបានធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរជើងគោក នៃស្នងការដ្ឋាននគបាលរាជធានីភ្នំពេញដើម្បីរង់ចាំធ្វើការដោះស្រាយតាមផ្លូវច្បាប់៕
