ភ្នំពេញ ៖ បុរស៣នាក់ជិះម៉ូតូមួយគ្រឿងក្នុងស្ថានភាពស្រវឹងបានជ្រុលទៅបុកពីក្រោយម៉ូតូ មួយគ្រឿងទៀតជិះដោយបុរស២នាក់បណ្ដាលអោយដួលរងរបួសធ្ងន់ស្រាល ហេតុការណ៍នេះ បានកើតឡើងកាលពីវេលាម៉ោង២និង៤០នាទីរំលងអាធ្រាត្រឈានចូលថ្ងៃទី១៦ ខែមិថុនា ឆ្នាំ២០១៤
នៅត្រង់ចំណុចខាងជើងផ្សារដើមគរមុខចំណតរថយន្តក្រុងក្រុមហ៊ុនផារ៉ាមោន តាមបណ្ដោយផ្លូវម៉ៅសេទុង ស្ថិតក្នុងសង្កាត់ផ្សារគ ខណ្ឌទួលគោក។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញបុរស២នាក់ ជិះមម៉ូតូធុនធំមួយគ្រឿងម៉ាកហុងដា ឌូក ពណ៌ខ្មៅលាយទឹកក្រូច ពាក់ស្លាកលេខ ភ្នំពេញ 1CB-5577 ជិះធ្វើដំណើរតាមបណ្ដោយផ្លូវម៉ៅសេទុង ទិសដៅពីត្បូងទៅជើង ខណៈនោះស្រាប់តែ មានបុរស៣នាក់ជិះម៉ូតូមួយគ្រឿងម៉ាកហុងដាស្កូពី ពណ៌ខ្មៅ ពាក់ស្លាកលេខ ភ្នំពេញ 1BI-3931 ក្នុងស្ថានភាពស្រវឹងមកពីក្រោយទិសដៅស្របគ្នាបណ្ដាលអោយបុកប៉ះដៃចង្កូតធ្វើអោយម៉ូតូទាំង២គ្រឿងដួលបោកនិងថ្នល់បណ្ដាលអោយភាគីទាំងសងខាងរងរបួសធ្ងន់ស្រាល។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍និងបញ្ជូនជនរងគ្រោះដែលរងរបួសធ្ងន់ទៅមន្ទីរពេទ្យភ្លាមៗ ក្រោយពេលកើតហេតុសមត្ថកិច្ចបានធ្វើការវាស់វែងនិងយកម៉ូតូទាំង២គ្រឿងទៀតរក្សាទុកនៅ អធិការដ្ឋាននគរបាលខណ្ឌទួលគោកដើម្បីរង់ចាំធ្វើការដោះស្រាយតាមផ្លូវច្បាប់ជាក្រោយ៕
