ភ្នំពេញ ៖ បុរសម្នាក់ស្រវឹងស្រាជោកជាំបានបើករថយន្តមួយគ្រឿងបញ្ច្រាស់ផ្លូវបណ្ដាលឱ្យគៀរ រថយន្តទួរីសមួយគ្រឿងធ្វើអោយរងការខូចខាត ហើយរថយន្តបង្កបានព្យាយាមបើករត់តែត្រូវ ប្រជាពលរដ្ឋនិងសមត្ថកិច្ចឃាត់ជាប់ ហេតុការណ៍គ្រោះថ្នាក់ចរាចរនេះបានកើតឡើងកាលពីវេលា
ម៉ោង១០និង៤០នាទីយប់ថ្ងៃទី១៥ខែមិថុនាឆ្នាំ២០១៤ នៅត្រង់ចំណុចខាងជើងផ្សារដើមគរ មុខហាងលក់ចង្ក្រានហ្គាសតូចធំ យីហោ ដួងតារា តាមបណ្ដោយផ្លូវម៉ៅសេទុង ស្ថិតក្នុង សង្កាត់បឹងសាឡាង ខណ្ឌទួលគោក។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញប្រុសម្នាក់ ស្រវឹងជោកជាំបើករថយន្តមួយគ្រឿងម៉ាកតូយ៉ូតា កាមរី (បាឡែន) ពណ៌ស ពាក់ស្លាកលេខ ភ្នំពេញ 2R-6267 តាមបណ្ដោយផ្លូវម៉ៅសេទុង ក្នុងទិសដៅពីត្បូងទៅជើងបញ្ច្រាស់ផ្លូវ ខណៈនោះក៏បាន បើកប៉ះនិងរថយន្តទួរីសមួយគ្រឿង ពណ៌ទឹកប៊ិច ពាក់ស្លាកលេខ ភ្នំពេញ 2D-4980 ដែលបើក ធ្វើដំណើរតាមបណ្ដោយផ្លូវម៉ៅសេទុង ទិសដៅពីជើងទៅត្បូង បណ្ដាលអោយរថយន្តទាំង២គ្រឿង រងការខូចខាតទាំងសងខាង។ បន្ទាប់ពីកើតហេតុរថយន្តបង្កបានព្យាយាមបើករត់ រហូតមកដល់ ចំណុចមុខនគរបាលសេដ្ឋកិច្ចនិងមន្ទីរកំចាត់គ្រឿងញៀន តាមបណ្ដោយផ្លូវលេខ២៣០ ក៏ត្រូវបាន ប្រជាពលរដ្ឋនិងសមត្ថកិច្ចឃាត់រថយន្តនិងអ្នកបើកបរជាប់។
ក្រោយពេលកើតហេតុភាគីទាំងសងខាងបានធ្វើការសម្របសម្រួសគ្នាជាង២ម៉ោងដោយភាគីបង្ក ព្រមចេញថ្លៃខូចខាតចំនួន១៥០ដុល្លារសំរាប់ជួសជុលរថយន្តទួរីសដើម្បីបញ្ចប់៕
