សៀមរាប : ជនសង្ស័យភេទប្រុស ម្នាក់នេះ មុខរបរមិនពិតប្រាកដរស់នៅក្នុងក្រុងសៀមរាបត្រូវបានសមត្ថកិច្ចនគរបាលក្រុងសៀមរាបសហការណ៍ជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គំ ក្រុង និង ខេត្តសៀមរាប ចាប់ឃាត់ខ្លួនយកមកកាន់អធិការដ្ឋាននគរបាលក្រុង
សៀមរាបដើម្បីធ្វើការសួនាំជាប់ពាក់ព័ន្ធក្នុងករណីអំពើលួចយកម៉ូតូ ។
លោកអនុសេនីយ៍ឯក នួន ស័ក្កិចំរើនរិទ្ធ អធិការរងនគរបាលក្រុងសៀមរាបទទួលបន្ទុកព្រហ្មទ័ណ្ឌបានឲ្យអ្នកយកព័ត៍មានយើងដឹងថាដោយទទួលបានការណែនាំឲ្យដឹកនាំកម្លាំងក្នុងអង្គភាពចុះប្រតិបត្តិការណ៍ធ្វើការតាមដានស្រាវ ជ្រាវនិងឈានដល់ការបង្ក្រាបបានចំពោះជនសង្ស័យម្នាក់នេះពីសំណាក់លោកវរសេនីយ៍ទោ ទិត្យ ណារ៉ុង អធិការនគរបាល ក្រុងសៀមរាប និង អនុវត្តតាមការយកចិត្តទុកដាក់ខ្ពស់ជាប្រចាំពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបក៏ដូចជា ដើម្បីធ្វើឲ្យការ អនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពថ្វេរដងផងនោះ ។ ទើបជាក់ស្តែងជនសង្ស័យនេះបន្ទាប់ពីសមត្ថកិច្ចបានទទួលពាក្យបណ្តឹងពីជនរងគ្រោះកាលពីថ្ងៃកើតហេតុទី ១៥ ខែឩសភា ឆ្នាំ២០១៤ កន្លងទៅ ថាជនសង្ស័យនេះបានចូលទៅលួចម៉ូតូម៉ាកសង់ ពណ៍ខ្មៅ សេរីឆ្នាំ ២០១៤ មួយគ្រឿង ដែលជនរងគ្រោះបានទុកម៉ូតូនៅខាងមុខផ្ទះស្ថិតនៅក្នុង ភូមិស្វាយដង្គំ សង្កាត់ស្វាយដង្គំ ក្រុងសៀមរាប ដោយមិនបានដកសោរចេញពីម៉ូតូផងនោះជនសង្ស័យនេះឃើញមានឱកាសល្អក៏ចូលទៅលួចតែម្តង ។ លោកអនុសេនីយ៍ឯក នួន ស័ក្កិចំរើនរិទ្ធ អធិការរងនគរបាលក្រុងសៀមរាបទទួលបន្ទុកព្រហ្មទ័ណ្ឌបានឲ្យ ដឹងទៀតថាបន្ទាប់ពីជនសង្ស័យបានធ្វើសកម្មភាពលួចយកម៉ូតូរបស់ជនរងគ្រោះបានហើយនោះគេក៏បានយកទៅលក់ឲ្យ ឈ្មោះ ឈឿន ឈាត ភេទប្រុស អាយុ ២៨ឆ្នាំ ជាជនជាតិខ្មែរស្នាក់នៅផ្ទះជួលបន្ទប់ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប មានមុខរបរជាបុគ្គលិក នៅខារ៉ាអូខេ សេន ក្នុងក្រុងសៀមរាប ក្នុងតំម្លៃ៥០០ ដុល្លាសហរដ្ឋអាមេរិក ។ លុះដល់ថ្ងៃទី ១៥ ខែមិថុនា ឆ្នាំ ២០១៤នេះ សមត្ថកិច្ចក៏បានបន្តការសើបអង្កេតនិងបានរកឃើញម៉ូតូរបស់ជនរងគ្រោះដែលបានបាត់អស់រយះពេល ១ខែ ដោយបានឃើញអ្នកទិញម៉ូតូនេះជិះនៅក្នុងក្រុងសៀមរាបសមត្ថកិច្ចក៏បានធ្វើការសួរនាំនិងបានធ្វើការដកហូតម៉ូតូពីឈ្មោះឈឿន ឈាត ដែលបានទិញពីជនសង្ស័យក្នុងតំម្លៃ៥០០ដុល្លាសហរដ្ឋអាមេរិកតែម្តង ។ ដោយសមត្ថកិច្ចបានបញ្ជាក់ថាបន្ទាប់ពីសមត្ថកិច្ចធ្វើការចាប់ឃាត់ខ្លួននិងបានធ្វើការសួរនាំចំពោះជនសង្ស័យនេះជាប់ពាក់ព័ន្ធនិងករណីខាងលើហើយនោះជនសង្ស័យបានឆ្លើយសារភាពថាគេពិតជាបានប្រព្រឹត្តនូវករណីទាំងអស់ខាងលើពិតប្រកដមែន ។ បច្ចុប្បន្នជនសង្ស័យត្រូវបានសមត្ថកិច្ចនគរបាលក្រុងសៀមរាបចំណាត់ការទៅតាមនិតិវិធីជាបន្ត ៕
