ខេត្តពោធិសាត់ ៖ បុរសម្នាក់រងរបួសស្ទើស្លាប់ស្ទើរស់ និងម្នាក់ទៀតរបួសស្រាល ខណៈពួកគេ នាំគ្នាចូលព្រៃរកអូស ត្រូវសត្វខ្លា ពួនសម្ងំស្ទាក់ហក់កន្ទ្រប់ខាំ តែត្រូវបុរសទាំងពីរនាក់ តដៃវាយរយៈពេលជិត១ម៉ោង បណ្តាលអោយសត្វខ្លារងរបួស ទាល់អស់ចិត្តក៏ដើរចេញទៅ ។ ហេតុការណ៍មនុស្សពីរនាក់ប្រយុទ្ធគ្នា ជាមួយសត្វខ្លា បណ្តាលអោយរងរបួសដូចគ្នានេះ បានកើតទ្បើង ត្រង់ចំនុចកោះក្រូចស្តី ក្នុងភូមិខ្សេតបូរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ តាមការអះអាងពីនគរបាល ប៉ុសិ៍សន្ទ្រែ បានអោយដឹងថា បុរសទាំងពីរនាក់ ជាឳពុកមា និងក្មួយ ឳពុកមាឈ្មោះ ងឹម ងេន អាយុ៥១ឆ្នាំ រស់នៅភូមិគល់ទទឹង ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ និងបុរសជាក្មួយឈ្មោះ នេត ឆារ៉ា អាយុ២៣ឆ្នាំ រស់នៅក្នុងភូមិស្រែពពាយ ស្រុកខាងលើ ។
នគរបាលបានបន្តទៀតថា បើតាមការរៀបរាប់ពីបុរសជនរងគ្រោះ បានឲ្យដឹងថា ពួកគាត់នាំគ្នាដើរ ចូលព្រៃ ក្នុងបំណងទៅរកអុស លុះដល់កន្លែងកើតហេតុ ស្រាប់តែសត្វខ្លា ដែលមិនដឹងថា វាពួនសម្ងំតាំងពីពេលណាទេ ស្រាប់តែហក់កន្ទ្រប់លើក្មួយរបស់គាត់ ឈ្មោះ នេត ឆារ៉ា ភ្លាមនោះគាត់ក៏ស្ទុះចូលទៅជួយ វាក៏ងាកមកបំរុងខាំគាត់វិញម្តង ចំនែកក្មួយប្រុសគាត់ភ័យពេក ក៏រត់ទ្បើងដើមឈើបាត់ ។
ប្រភពបន្តទៀតថា មុនដំបូងគាត់ស្ទើតែគ្មានព្រលឹងក្នុងខ្លួនទេ ហើយម្យ៉ាងវិញទៀត ក្មួយគាត់ទ្បើងដើមឈើចោលគាត់បាត់ទៀត ប៉ុន្តែគាត់ពង្រឹងអារម្មណ៍បាន ក៏ប្រយុទ្ធគ្នាបន្តជាមួយសត្វខ្លា គាត់កាប់វាត្រូវច្រើនដែរ តែគាត់ចាំមិនបានទេ ថាគាត់កាប់វាត្រូវត្រង់ណាខ្លះនោះ តែគាត់ចាំបាន នៅពេលដែលគាត់ដួល សត្វខ្លាវាហក់មកបំរុងហាមាត់ខាំ ពេលនោះកាត់ក៏យកកាំបិទផ្គាក់ កាប់ចំមាត់វាទៀត ធ្វើឲ្យមាត់វា រហែកមាត់ទាំងសង់ខាង ហើយវាក៏រត់ចេញទៅ គាត់ប្រឹងងើបបានត្រឹមតែលុតជង្គង់ ខ្លាកំណាចនោះ ក៏មកម្តងទៀត គាត់កាប់ចំចង្កូវច្រមុះពេញទំហឹង
មួយផ្គាក់ទៀត ធ្វើអោយខ្លាក្រវីក្បាល ដើរចេញតែម្តង ចាប់ពេលនោះ គាត់ក៏លែងដឹងខ្លួនទាំងអស់ ស្រាប់តែដឹងខ្លួនទ្បើង គាត់ក៏នៅក្នុងមន្ទីរពេទ្យ ស្រុកភ្នំក្រវាញតែម្តងទៅ ។ ប្រភពពីនគរបាល បានបញ្ជាក់ទៀតថា នៅពេលគាត់ដួកសន្លាប់ ដោយរងរបួសសុះសាច់ ហើយសត្វខ្លា ដើរគេចទៅបាត់ ក្មួយគាត់ចុះពីចុងឈើ អោយគេឯងជួយសែងឳពុកមា រកភូមិក្បែៗនោះ ដើម្បីរកម៉ូតូដឹកគាត់មទៅមន្ទីពេទ្យ ៕
