កងទ័ពប៉ាគីស្ថាន កាលពីថ្ងៃទី១៥ មិថុនា ចាប់ផ្តើមការវាយលុកតាមជើងគោក និងជើងអាកាសក្នុងទ្រង់ទ្រាយធំមួយប្រឆាំងពួកតាលីបង់ ក្នុងតំបន់កុលសម្ព័ន្ធវ៉ាហ្ស៊ីវីស្ថាន ខាងជើង ជាមួយការដាក់ពង្រាយទាហានប្រមាណជា៤០.០០០នាក់ថែមទៀត កងកាំភ្លើងធំ និងឧទ្ធម្ភាគចក្រប្រយុទ្ធ ។
ប្រតិបត្តិការដោយទ្រង់ទ្រាយធំនោះ ធ្វើឡើង១សប្តាហ៍ក្រោយការវាយប្រហាររបស់កងកុំម៉ង់ដូតាលីបង់ និងពួកយុទ្ធជនអ៊ូស្បេក ប្រឆាំងព្រលានយន្តហោះក្រុងការ៉ាជី ដែលបណ្តាលឱ្យមនុស្សស្លាប់៣៨នាក់ ។ការវាយលុករបស់កងទ័ពបា៉គីស្ថាន បើកធ្វើនាពេលយប់ជាមួយការវាយឆ្មក់របស់កងយន្តហោះដែល ទម្លាក់គ្រាប់បែកលើបណ្តាទីតាំងលាក់ខ្លួនរបស់ពួកតាលីបង់នៅ ជិតព្រំដែនជាមួយអាហ្វហ្គានីស្ថាន ហើយសម្លាប់ពួកបះបោរប្រមាណជា៨០នាក់ ក្នុងថ្ងៃទី១៥ មិថុនា តែមួយគត់ ។
កងទ័ពប៉ាគីស្ថានថ្លែងថា ការវាយប្រហារសំដៅជាពិសេសលើពួកសកម្មប្រយុទ្ធជនជាតិភាគតិច អ៊ូស្បេក ដែលមួយចំនួនចូលរួមជាមួយក្រុមកុំម៉ង់ដូវាយប្រហារព្រលានយន្ត ហោះក្រុងការ៉ាជី។នៅក្រុង មី រ៉ានសាហ៍ ប្រភពព័ត៌មានផ្លូវការមួយរាយការណ៍ថា បណ្តាយន្តហោះប្រដេញបានវាយប្រហារលើបណ្តាទីតាំងលាក់ខ្លួននៅ ភូមិ ដាហ្គាន ជិតព្រំដែនប៉ាគីស្ថាន-អាហ្វហ្គានីស្ថាន ។ ប្រភពនោះបន្តថា មេបញ្ជាការពួកអ៊ូស្បេក សំខាន់ម្នាក់ឈ្មោះ អាប់ឌុល រេហ៍ម៉ាន់ បានត្រូវស្លាប់ក្នុងការវាយប្រហារទាំងនោះ ។ លោក អាប់ឌុល រេហ៍ម៉ាន់ ជាមេគំនិតម្នាក់នៃការវាយប្រហារព្រលានយន្តហោះក្រុងការ៉ាជី ។
យោងតាមប្រភពព័ត៌មានយោធាថា ពួកសកម្មប្រយុទ្ធជនជាតិអ៊ួយហ្គួរ ដែលភាសាពួកគេស្រដៀងនឹងភាសារបស់ពួកអ៊ូស្បេក ស្ថិតក្នុងចំណោមពួកដែលត្រូវសម្លាប់ ។ ក្រុងប៉េកាំងសង្ស័យពួកជ្រុលនិយមអ៊ូយហ្គួរ ដែលរត់គេចខ្លួនទៅកាន់តំបន់កុលសម្ព័ន្ធប៉ាគីស្ថាន ថាជាអ្នកបង្កអំពើហិង្សាក្នុងតំបន់ស៊ីនជាំង របស់ចិន ។ប្រភពយោធាអះអាងប្រាប់រ៉យទ័រថា ទាហានដល់ទៅ៤០.០០០នាក់ ត្រូវបានបញ្ជូនបន្ថែមទៅកាន់តំបន់វ៉ាហ្ស៊ី រីស្ថាន ខាងជើង សម្រាប់ប្រតិបត្តិការយោធាធំនេះ ធ្វើឱ្យចំនួនទាហានសរុបនៅទីនោះឡើងដល់៨០.០០០ នាក់ ។
