ខេត្តកំពង់ស្ពឺ ៖ លោក អោ វណ្ណថេន ប្រធានមន្ទីរសុខាភិបាលខេត្តកំពង់ស្ពឺ និងប្រធានការិយាល័យគណនេយ្យរបស់គាត់ត្រូវបានមន្ត្រីក្រោមឪវាទមួយចំនួនរិៈគន់ថាលោកប្រធានមន្ទីរបានរួមដៃជាមួយប្រធានគណនេយ្យប្រព្រឹត្តអំពើពុករលួយអស់រយៈពេលជាច្រើនឆ្នាំកឹបកេងថវិការជាតិអស់រាបរយលានរៀលក្នុងមួយឆ្នាំៗ។
តាមប្រភពពីមន្ត្រីជាច្រើនបានឲ្យដឹងថា ចាប់តាំងពីលោក អោ វណ្ណថេន ឡើងធ្វើជាប្រធានសុខាភិបាលខេត្តកំពង់ស្ពឺ មន្ទីរមួយនេះតែងតែកើតមានឡើងនូវរឿងអាស្រូវជាច្រើន តាមរយៈការធ្វើឯសារបន្លំការចំណាយ កឹបកេងថវិការជាតិតាមបែបពុករលួយ។ អំពើពុករលួយដែលប្រព្រឹត្តឡើយដោយលោក អោ វណ្ណថេន និងបក្ខពួកគឺភាគច្រើនកឹបកេងរាល់ការចំណាយរបស់មន្ទីរសុខាភិបាលដូចជាប្រាក់នៅក្នុងជំពូក៦០ ជំពូក៦១ ជំពូក៦២ និងជំពូក៦៥ ជាដើម។
ថវិការដែលលោក អោ វណ្ណថេន អាចកឹបកេងបានច្រើនជាងគេនោះគឺប្រាក់នៅក្នុងជំពូក៦៥ តួយ៉ាងដូចជានៅឆ្នាំ២០១៣ កន្លងទៅមន្ទីរសុខាភិបាលខេត្តបានចំណាយថវិការលើជំពូកនេះអស់សរុប ៩១៦,១៨១,០០០រៀល ក្នុងនោះចំណាយជំនួយដល់ប្រជាជនសម្រាកពេទ្យអស់ចំនួន ២៧២,១៤៥,០០០រៀល និងប្រាក់សម្រាប់អាហារអ្នកជំងឺមានចំនួន ៣៦០,០០០,០០០រៀល ប្រាក់សម្រាប់ទិញឪសុទ្ធគឺមានចំនួន ២៨៤,០៣៦,០០០រៀល ប៉ុន្តែថវិការទាំងនេះត្រូវបានគេរួមដៃគ្នាកឹបកេងអស់មួយចំនួនធំ ដូចជាប្រាក់សម្រាប់ឧបត្ថម្ភប្រជាជនសម្រាកពេទ្យ និងប្រាក់សម្រាប់ផ្គត់ផ្គង់អាហារសម្រាប់អ្នកសម្រាកពេទ្យ។
តាមប្រភពដដែលបានឲ្យដឹងថាអំពើពុករលួយនៅក្នុងមន្ទីរសុខាភិបាលនោះមានទំហំធំធេងខ្លាំងណាស់ ប៉ុន្តែនៅចំណុចខ្លះគេអាចមើលឃើញដោយផ្ទាល់ភ្នែកនិងចំណុចខ្លះទៀតគឺមានលក្ខណៈស៊ីជម្រៅដែលមន្ត្រីល្មមៗមិនអាចមើលដឹង។ ប្រភពដដែលបានបញ្ជាក់ថារាល់ការចំណាយថវិការមន្ទីរសុខាភិបាលគឺក្នុងឆ្នាំ២០១៣ គឺសរុបអស់រហូតទៅដល់ ១០,៣៤៣ លានរៀល ដោយក្នុងនោះចំណាយក្នុងជំពូក៦០ អស់ ២,១៥៦ លានរៀល ជំពូក៦១ អស់ ៩៤០ លានរៀល ជំពូក៦២ អស់ ២៨៧ លានរៀល និងជំពូក៦៤ អស់ ៦,០៣៨ លានរៀល(បន្ទុកបុគ្គលិក) ជំពូក៦៥ អស់ ៩១៦ លានរៀល។
ហើយថវិការនៅស្ទើរគ្រប់ជំពូកទាំងអស់គឺត្រូវបានលោកប្រធានមន្ទីរនិងគណនេយ្យឃុបឃិតគ្នាកឹបកេងទោះបីការចំណាយថវិការខ្លះដោយមានការដេញថ្លៃតាមបែបលទ្ធកម្មក៍ដោយ ក៍ពួកគេនៅតែអាចប្រព្រឹត្តអំពើពុករលួយបានតាមរយៈចូលដៃជើងជាមួយក្រុមហ៊ុនផ្គត់ផ្គង់សម្ភារៈ ដោយទទួលយកសម្ភារៈមិនគ្រប់តាមចំនួនកំណត់ឬតាមស្តងដាដើម្បីបានផលប្រយោជន៍ចែកគ្នា។
