ខេត្តរតនគិរី៖ អនុគណៈកម្មការសុវត្ថិភាពចរាចរណ៍ផ្លូវគោកខេត្តរតនគិរី បើកយុទ្ធនាការរឹតបន្តឹងការអនុវត្តច្បាប់ចរាចរណ៍ផ្លូវគោកនៅស្រុកកូនមុំ ខេត្តរតនគិរី នាព្រឹកថ្ងៃទី១២ ខែមករា ឆ្នាំ២០១៨ អនុគណៈកម្មការសុវត្ថិភាព
ចរាចរណ៍ផ្លូវគោកខេត្តរតនគិរី បើកយុទ្ធនាការរឹតបន្តឹងការអនុវត្តច្បាប់ចរាចរណ៍ផ្លូវគោក ដែលពិធីនេះបានប្រារព្ធធ្វើឡើងនៅបរិវេណសាលាអនុវិទ្យាល័យត្រពាំងក្រហម ស្រុកកូនមុំ ក្រោមអធិបតីភាពលោក យឹម ផែន អភិបាលរងខេត្តរតនគិរី ។
នៅក្នុងយុទ្ធនាការនេះ លោក យឹម ផែន បានស្នើសុំឲ្យប្រជាពលរដ្ឋ ចូលរួមអនុវត្តច្បាប់ចរាចរណ៍ផ្លូវគោកទាំងអស់គ្នា និងបើកបរម៉ូតូពាក់មួកសុវត្ថិភាព ដើម្បីការពារអាយុជីវិតរបស់លោកអ្នក ។
ឯកឧត្តមអភិបាលរងខេត្ត ក៏បានណែនាំដល់កម្លាំងចរាចរណ៍ត្រូវមានឥរិយាបថទន់ភ្លន់ចំពោះប្រជាពលរដ្ឋ ដោយត្រូវអប់រំណែនាំអំពីសារប្រយោជន៍មួកសុវត្ថិភាព និងច្បាប់ចរាចរណ៍ផ្លូវគោកជាគោលសំខាន់ៗដល់ពួកគាត់ ដោយមិនត្រូវប្រើប្រាស់អាកប្បកិរិយាណាមួយមិនសមរម្យឡើយ ។
ដោយឡែករាល់អ្នកបើកបរត្រូវគិតថា ការពាក់មួកសុវត្ថិភាពគឺដើម្បីការពារអាយុជីវិតរបស់អ្នក មិនមែនពាក់ដើម្បីការពារប៉ូលីសផាកនោះឡើយ ។
នៅក្នុងយុទ្ធនាការនេះ អនុគណៈកម្មការសុវត្ថិភាពចរាចរណ៍ផ្លូវគោក បានចែកមួកសុវត្ថិភាពប្រមាណ៣០០មួកជូនដល់ប្រជាពលរដ្ឋ សិស្សានុសិស្ស និងបិទចំណាំងផ្លាតគោយន្តផងដែរ ៕ យក្ខឡោម
