ខ្សែបម្រើក្រុមអាត់ការ៉ូក្រូអាតកីឡាករ Danijel Pranjic (ដានីចេល ប្រានជីក) ជឿជាក់ថា ក្រុមរបស់ខ្លួន នឹងកាន់តែខ្លាំងនៅពេលដែលខ្សែប្រយុទ្ធ Mario Mandzukic (ម៉ារីអូ មេនហ្ស៊ូគីក) វិលចូលលេងវិញក្នុងជំនួបជាមួយ ខ្លាអាហ្វ្រិកកាមេរូនក្នុងពូល A ។ ខ្សែប្រយុទ្ធក្លិប Bayern Munich បានអវត្តមានក្នុងការប្រកួតបើកឆាកពេលដែលក្រូអាតប្រកួតចាញ់ម្ចាស់ផ្ទះ ប្រេស៊ីលដោយសាតែរូបគេជាប់បម្រាម ។ កីឡាករ Pranjic ប្រាប់គេហទំព័រ FIFA.com ថា “Mandzukic ពិតជាធ្វើឲ្យយើងកាន់តែខ្លាំងហើយគ្មាន កីឡាករណាដែលអាចជំនួសតំណែងរបស់គាត់បាននោះទេ” ។
Pranjic បាននិយាយទៀតថា “Nikica Jelavic (នីគីកា ជេឡាវីក) ធ្វើបានយ៉ាងល្អពេលក្រូអាតជួបប្រេស៊ីល ចំពោះ Manzukic គឺ យើងត្រូវការគាត់ ហើយក្រុម នឹងប្រែប្រួលទាំងស្រុងបើគ្មានគាត់” ។ គួរបញ្ជាក់ថា Mandukic ស៊ុតបាន២១គ្រាប់ឲ្យក្លិប Bayern Munich កាលពីរដូវកាលមុន ៕
