កោះកុង៖ មន្ត្រីគយស្រុកស្រែអំបិល នៅតែធំក្លិនពុំសូវស្រួល ខណះដែលមានបែកធ្លាយរឿង ប្រមូលពន្ធក្រៅបញ្ជីរដ្ឋ និងធ្វើការខុសវិជ្ជាជីវះ។បើយោងសេចក្តីរាយការណ៍មួយដែលសុំមិនបញ្ចេញឈ្មោះ បានអោយដឹងថា មានទំនិញជាច្រើនប្រភេទ ដែលដឹកតាមកប៉ាល់ មកឡើងនៅកំពង់ផែស្រែអំបិល រួមនិងរថយន្តទំនិញធំៗរាប់សិបគ្រឿងទៀត ដែលចេញពីដែនសមត្ថកិច្ចគយស្រែអំបិល គឺសុទ្ធតែគ្មានការត្រួតពិនិត្យ និងបង់ពន្ធអោយគ្រប់គ្រាន់ចូលរដ្ឋឡើយ។
យោងតាមប្រភពច្បាស់ការមួយបានបង្ហើបថា ដោយសារការសម្រុកនាំចូលទំនិញពីប្រទេសថៃ មានការកើនឡើងច្រើនខ្លាំងពេក បានធ្វើអោយការប្រមូលពន្ធនៅតំបន់ស្រែអបិលនេះ មានការកើនឡើងលើសពីផែនការរំពឹងទុក ក៏ប៉ុន្តែទន្ទឹមនឹងការកើនឡើងលើសផែនការនេះ មន្ត្រីគយបានឆ្លៀតឱកាសរកស៉ីក្រៅបញ្ជីរដ្ឋ ដោយមានការត្រូវរូវគ្នាជាមួយក្រុមឈ្មួញឈ្មោះ ឡុង ម៉េង យាយរ៉ា 
និងតាឈីម ដោយបានប្រើប្រាស់រូបភាពគ្រប់បែបយ៉ាង ដើម្បីបន្លំយថាប្រភេទនៃមុខទំនិញ ដែលប្រភេទបង់ពន្ធថ្លៃ មកដាក់ទំនិញប្រភេទបង់ពន្ធថោកវិញ ព្រមទាំងបានប្តូរបរិមាណពីច្រើនមកតិច ដែលធ្វើអោយការបង់ពន្ធអស់តិច មិនសមាមាត្រនិងចំនួនទំនិញពិត។ ការប្រើរូបភាពបន្លំបែបនេះ បានធ្វើអោយក្រុមឈ្មួញ និងមន្ត្រីគយចំនេញទាំងសងខាង និងសល់លុយក្រោមតុសម្រាប់ចែកគ្នាជារៀងរាល់ថ្លៃ ដែលជាហេតុធ្វើអោយប្រាក់ចំនូលរដ្ឋ នៅតែមានកំណើនយឺត និងបាត់បង់ដោយមិនដឹងខ្លួន។
ទាក់ទងនិងការលេចធ្លាយរឿងមិនល្អនៃការប្រមូលពន្ធក្រៅបញ្ជីនេះ លោក គង់ សំរេច ប្រធានការិយាល័យគយនិងរដ្ឋករស្រែអំបិល បានមានប្រសាសប្រាប់ក្រុមអ្នកសាព័ត៌មាន នៅរសៀលថ្ងៃទី១៦នេះ ដោយបដិសេធថា លោកពុំដែលបានប្រើរូបភាពប្រមូលពន្ធដោយបន្លំយថាប្រភេទ និងបរិមាណ ទំនិញដូចការលើកឡើងនេះទេ។ បើសិនជាមានការបន្លំមែនមិនអាចប្រមូលបានលើសផែនការឡើយ៕
