ខេត្តក្រចេះ៖ ជនសង្ស័យចំនួន២នាក់ជាមុខសញ្ញាជួញដូរនិងប្រើប្រាស់ថ្នាំញៀន គឺត្រូវកម្លាំងនគរបាលស្រុកស្នួល ចាប់ឃាត់ខ្លួន ជាមួយនិងវត្ថុតាងថ្នាំញៀនមួយចំនួនខណះ ដែលពួកគេកំពុងធ្វើសកម្មភាពចែកចាយនិងប្រើប្រាស់គ្រឿងថ្នាំញៀន។ ប៉ូលិសស្រុកស្នួលបានឲ្យដឹងថា ការចុះចាប់ឃាត់ខ្លួនជនសង្ស័យទាំងពីរនាក់គឺ បានធ្វើឡើងកាលពីយប់ថ្ងៃទី១៧ខែ មិថុនា នៅក្នុងផ្ទះជួលមួយកន្លែងស្ថិតក្នុងភូមិក្បាល ស្នួល ឃុំស្នួល ស្រុកស្នួល ខេត្តក្រចេះ។
ក្នុងការចុះចាប់បង្ក្រាបគឺសត្ថកិច្ច បានឆែក ឆេររកឃើញមានថ្នាំញៀន ប្រភេទម៉ាទឹកកក ចំនួន២កញ្ចប់ធំ និង៥កញ្ចប់តូចរួមនិង វត្ថុតាងមួយចំនួនទៀត។ អធិការនគរបាលស្រុកស្នួល លោកវរៈសេនីយ៏ត្រី ចាន់ សុគីម បានឲ្យដឹងទៀតថាជនសង្ស័យទាំងពីរនាក់ ១.ឈ្មោះ អ៊ុក រិទ្ឋី អាយុ២៥ឆ្នាំ និងម្នាក់ទៀតឈ្មោះ កែម ម៉េង ឈាង អាយុ២១ឆ្នាំ ជនសង្ស័យទាំងពីរនាក់មានទីលំនៅក្នុង ភូមិក្បាលស្នួល ឃុំស្នួល ស្រុកស្នួល ។
លោកអធិការបានបញ្ជាក់ថា ក្រោយពីកម្លាំងជំនាញបានធ្វើការអង្កេតលើមុខសញ្ញា ជនទាំងពីរនាក់នេះបានច្បាស់រួចមក លោកក៏សុំគោលការណ៏ឈានដល់ការឃាត់ ខ្លួនតែ ម្តង។ នាយការិយាល័យប្រឆាំងគ្រឿងញៀនខេត្ត លោក កែវ ចាន់ធី បានឲ្យដឹងថា បន្ទាប់ពីកម្លាំងនគរបាលស្រុកស្នួល បានធ្វើការឃាត់ខ្លួនជនសង្ស័យទាំងពីរនាក់នេះ នៅរសៀល ថ្ងៃទី១៨ មិថុនា នេះ គឺកម្លាំងជំនាញបានធ្វើកោសល្យវិច្ច័យទៅលើថ្នាំ ញៀនដែលបានចាប់រឹបអូសពីជនសង្ស័យ ហើយពិនិត្យឃើញថា គឺសុទ្ឋសឹងតែមាន សារធាតុញៀនប្រភេទមេតំហ្វេតាម៉ីនទាំងអស់៕ 
