ចំពោះ Luis Suarez (ល្វីស ស៊ូអារ៉េស) គ្រូបង្វឹកក្រុមតោកំណាចអង់គ្លេសលោក Roy Hodgson ជឿជាក់ថា ការវិលពីរបួសរបស់កីឡាករ Luis Suarez (ល្វីស ស៊ូអារ៉េស) អាចនឹងធ្វើឲ្យក្រុមអ៊ុយរ៉ាហ្គាយមានកម្លាំងកាន់តែខ្លាំង ។ កីឡាកររូបនេះមិនបានចូលលេងទេក្នុងជំនួបអ៊ុយរ៉ាហ្គាយចាញ់កូស្តារីកា៣-១ដោយសាតែបញ្ហារបួសជង្គង់ ហើយនៅយប់នេះរូបគេនឹងវិលមកជួយក្រុមរបស់លោក Oscar Tabarez (អូស្តារ តាបារ៉េស) វិញ ។
លោក Hodgson ប្រាប់អ្នកសារព័ត៌មានថា “អង់គ្លេសត្រូវតែប្រុងប្រយ័ត្នចំពោះ Luis Suarez យើងជឿថា អ៊ុយរ៉ាហ្គាយនឹងខ្លាំងជាងមុនពេល Suarez បង្ហាញវត្តមាននៅយប់នេះ” ។ លោក Hodgson និយាយទៀតថា “យើងដឹងថា Suarez ជាកីឡាករល្អ គាត់អាចធ្វើបានគ្រប់យ៉ាង ហើយការបង្ហាញវត្តមានរបស់គេធ្វើឲ្យក្រុមអ៊ុយរ៉ាហ្គាយទាំងមូលកាន់តែមានឥទ្ធិពលថែមទៀត” ។ គួរបញ្ជាក់ថា នៅយប់នេះអង់គ្លេសនឹងត្រូវជួបជាមួយអ៊ុយរ៉ាហ្គាយនៅម៉ោង២រំលងអាធ្រាត ៕
