ចង់បានអ្នកចាំទី Guillermo Ochoa (ហ្គីលលើម៉ូ អូឆូ) អ្នកចាំទីជម្រើសជាតិមិចស៊ីកូ Guillermo Ochoa (ហ្គីលលើម៉ូ អូឆូ) កំពុងមានទំនាក់ទំនងលើការផ្លាស់ទៅកាន់ ក្របខណ្ឌ Premier League ស្របពេលដែលក្លិបកាំភ្លើងធំ Arsenal និងហង្សក្រហម Liverpool ក៏មានចំណាប់អារម្មណ៍ចង់បានរូបគេផងដែរ ។
គេហទំព័រ Metro បានចុះផ្សាយថា អ្នកចាំទីរបស់ក្រុម AC Ajaccio (អេស៊ី អាហ្សាក់ហ្ស៊ីអូ) រូបនេះនឹងគ្មានក្រុមលេងនៅរដូវក្តៅនេះពេលដែលកិច្ចសន្យារបស់គេជាក្លិបបារាំងមួយនេះផុតកំណត់ ។ Ochoa បង្ហាញពីទម្រង់ចាប់បាល់យ៉ាងល្អក្នុងការប្រកួតដែលមិចស៊ីកូប្រកួតស្មើម្ចាស់ផ្ទះប្រេស៊ីល០-០ ក្នុងយុទ្ធនាការ World Cup ហើយបានទាក់ទាញចំណាប់អារម្មណ៍ពីសំណាក់ក្លិបធំៗជាច្រើន ។
គួរបញ្ជាក់ថា Arsenal កំពុងតែស្វែងរកអ្នកចាំទីថ្មីម្នាក់ដើម្បីមកជំនួស Lukasz Fabianski (លូកាស ហ្វាប៊ីអានស្គី) ដែលបានផ្លាស់ទៅក្រុម Swansea City ខណៈ Liverpool ចង់បានរូបគេដើម្បីជំនួស Pepe Reina (ប៉េប៉េ រ៉េណា) ៕
