កំពង់ឆ្នាំង៖ជនសង្ស័យជាអ្នករកស៊ីឆក់ត្រី៣នាក់ ត្រូវបានសហគមនេសាទព័ទ្ធចាប់ខ្លួន និងបានប្រគល់អោយមន្ត្រីជលផលភ្លាមៗ ខណៈពួកគេទាំង៣នាក់កំពុងត្រឡប់មកពីប្រព្រឹត្តបទល្មើសឆក់ត្រីវិញ ដែលហេតុការណ៏នេះបានកើតឡើងកាលពីវេលាម៉ោង ៦និង១០នាទីល្ងាចថ្ងៃទី១៧
ខែមិថុនា ឆ្នាំ២០១៤ ស្ថិតក្នុងភូមិកន្លែងភេ ឃុំគោកបន្ទាយ ស្រុករលាប្អៀរ ជនល្មើសទាំង៣នាក់នោះត្រូវបានសមត្ថកិច្ចរដ្ឋបាលជលផលកសាងសំណុំរឿងតាមនីតិវិធី បញ្ជូនទៅឃុំខ្លួននៅសាលាដំបូងខេត្តនាល្ងាចថ្ងៃទី១៨ ខែមិថុនា ឆ្នាំ២០១៤នោះផងដែរ។
លោកឈឹម ឈឿន ប្រធានសហគមនេសាទភូមិកន្លែងភេបានអោយដឹងថា៖មុនពេលចាប់ខ្លួនលោកបានទទួលព័ត៌មានពីប្រជាពលរដ្ឋនៅក្នុងសហគម ហើយលោកក៍បានដឹកនាំកំលាំងសហគមធ្វើការពួនស្ទាក់ និងចាប់បានជនល្មើសចំនួន៣នាក់និងឧបករណ៍ឆក់ត្រីដែលជាវត្ថុតាងនៃបទល្មើស ដែលរួមមានអាំងវែកទ័រ១គ្រឿង អាគុយ១គ្រឿង ត្រីដែលឆក់បាន៣ក្បាល និងបានបញ្ជូនពួកគេមកជំនាញរដ្ឋបាលជលផលចាត់ការតាមផ្លូវច្បាប់។
មន្ត្រីខ័ណ្ធរដ្ឋបាលជលផលកំពង់ឆ្នាំងបានអោយដឹងថា៖ជនល្មើសទាំង៣នាក់ខាងលើនេះទី១ឈ្មោះ ជា រស្មី អាយុ២៥ឆ្នាំ,ទី២ឈ្មោះ ប៉ិល បឿន អាយុ៣៣ឆ្នាំ,៣ឈ្មោះ ប្រាក់ ស៊ីលៀម អាយុ៣៨ឆ្នាំ ពួកគេរស់នៅក្នុងភូមិឃុំកើតហេតុខាងលើ។
នៅចំពោះមុខសមត្ថកិច្ចជំនាញជនល្មើសទាំង៣នាក់បានព្យាយាមបដិសេថភូតភរថា៖អាំងវែទ័រឆក់ និងត្រីមិនមែនជារបស់ពួកគេទេ តែអាគុយ៤០អំពែរជារបស់ពួកគេយកទៅដើរឆ្លុះសត្វ ។
ជនល្មើសទាំងបីនាក់ត្រូវបានសមត្ថកិច្ចរដ្ឋបាលជលផលខ័ណ្ធកំពង់ឆ្នាំងកសាងសំណុំរឿងតាមនីតិវិធី បញ្ជូនខ្លួននិងវត្ថុតាងទៅកាន់សាលាដំបូងខេត្តកំពង់ឆ្នាំងនៅល្ងាចថ្ងៃទី១៨ ខែមិថុនា ឆ្នាំ២០១៤ ដើម្បីអោយស្ថាប័នអយ្យការចោទប្រកាន់ និងជំនុំជំរះជនល្មើសទាំង៣តាមផ្លូវច្បាប់។
សូមបញ្ជាក់ថា៖តាមច្បាប់ស្តីពីជលផល បទល្មើសឆក់ត្រីត្រូវផ្តន្ទាទោសដាក់ពន្ធនាគារពី៣ទៅ៥ឆ្នាំ។ទោសទណ្ឌនៃបទល្មើសខាងលើនេះ មន្ត្រីជលផលធ្លាប់បានអប់រំនិងផ្សព្វផ្សាយជាញឹកញាប់នៅតាមមូលដ្ឋាន ដើម្បីអោយប្រជានេសាទទាំងអស់បានជ្រួតជ្រាប។សមត្ថកិច្ចជំនាញបានអោយដឹងថា៖ការឆក់ត្រីបានធ្វើអោយមច្ឆាជាតិទាំងកូនទាំងមេ រងគ្រោះថ្នាក់យ៉ាងធ្ងន់ធ្ងរ។ដោយឡែកមេពូជត្រីដែលត្រូវគេឆក់មិនងាប់ភ្លាមៗទេ វាត្រូវរងគ្រោះ៣ឆ្នាំដោយមិនអាចពងកូនបាន បទល្មើសនេះជាគ្រោះថ្នាក់យ៉ាងធ្ងន់ធ្ងរដល់ពូជមច្ឆាជាតិដែលត្រូវតែហាមឃាត់ជាដាច់ខាតសង្កេត។
មន្ត្រីម្នាក់សុំមិនបញ្ចេញឈ្មោះបានអោយដឹងថា៖បើទោះជាមានការហាមឃាត់និងការពារដោយច្បាប់យ៉ាងនេះក្តី ក៏បទល្មើសឆក់ត្រីនេះ សព្វថ្ងៃកំពុងតែកើតមានយ៉ាងគគ្រឹកគ្រេងនៅពាសពេញតាម បឹងបួរ ទន្លេ អូរ ព្រែក ។ល។ សមត្ថកិច្ចបង្ក្រាបបានតិចតួចណាស់ ដោយសារតែអ្នករកស៊ីឆក់ត្រីទាំងនោះគឺគេរកតែពេលយប់ ហើយពួកគេមិនខ្លាចសមត្ថកិច្ចឡើយ បើសមត្ថកិច្ចហ៊ានចូលចាប់ពួកវា វានិងបើកបាឡាបំបុកពន្លិចទូកសមត្ថកិច្ចវិញ បញ្ហានេះបានធ្វើអោយមានការពិបាកក្នុងការចុះបង្ក្រាបម្តងៗ៕
